Алматы қаласына қарасты Алатау ауданы әкімдігінің күзетшісі «Хабар 24» телеарнасының тілшісін белінен қапсыра қысып, тік көтереді де, бірнеше есікті ашып, далаға сүйреп шығарады. Журналистердің абыройына нұқсан келтірген атышулы оқиғаға (үстінен басыңыз) байланысты ҚР Ақпарат және қоғамдық даму министрі Аида БАЛАЕВА пікір білдірді.
«Өздеріңізге мәлім, Алматы қаласы, Алатау ауданы әкімдігі қызметкерінің журналист Ақбөпе Тәңірбергенге күш қолданған теріс әрекеті интернет желісінде қызу талқыланып жатыр. Аудандық әкімдіктің жауапты тұлғаларының бұған қатысты еш шара қолданбауы мәселені тіпті де ушықтырып отыр. Бұл, әрине, өте өкінішті және біздің бүгінгі “еститін мемлекет”, “ашық әкімдік” қағидаларына қайшы келетін жағдай. Журналистердің құқығын бұзуға, олардың ресми жұмысына кедергі келтіріп, күш көрсетуге ешқашан жол берілмеуі керек. Олар өздерін қай жерде де еркін сезінуі тиіс. БАҚ өкілдері еліміздің тиісті заңнамалары мен нормативті-құқықтық актілеріне сәйкес қажетті толыққанды ақпарат алуға қай кезде де құқылы. Бұл жағдайға қатысты Алматы қаласы әкімдігінің басшылығы қызметтік тексеру жүргізіп, тиісті шаралар қабылдауы қажет деп санаймын. Кінәлі тұлғалар жауапқа тартылуы тиіс. Алдағы уақытта қай жерде болмасын, БАҚ өкілдеріне қатысты бұндай келеңсіз жағдайларға жол берілмеуі қажет», — деп әлеуметтік желіде пікір қалдырды министр.
«ЖЕТІСУ-АҚПАРАТ»
