Отбасымызда мектеп жасындағы үш бала және балабақшаға баратын бір бүлдіршін бар. Солардың денсаулығы мен амандығы үшін отағасы екеуміз де өзіміз тіркеуде тұрған қалалық емханадан «Спутник V» вакцинасын қабылдадық.
Ол, біріншіден, өзіміз үшін керек. Мектепте қызмет ететіндіктен балалармен, ата-аналармен, өзге де ұстаз әріптестермен тікелей қарым-қатынаста жұмыс істеймін. Қаншама оқушының денінің саулығы да ұстаздардың жауапкершілігінде. Сондықтан вакцина алу үйінде бала-шағасы бар, көпшілікпен тікелей қарым-қатынаста жұмыс істейтін адамдар үшін ауадай қажет деп білемін.
Көп адамда вакцина алған соң ауырып қаламыз ба, денсаулығымызға кері әсер ете ме деген қорқыныш болады. Жасыра алмаймын, бізде де ондай үрей болды. Бірақ, балаларымыздың саулығы үшін тәуекел еттік. Бірақ, вакцинадан кейінгі жағдайымыз жақсы, салған орны аз ғана ауырды, басқа еш өзгеріс болмады. Үш күн бойы дәрігердің бақылауында болдық.
Балаларымның әкесі Есболат Есімханұлы құқық қорғау саласында еңбек еткендіктен зейнетке ерте шыққан жан. Қазір зейнеткер болса да вакцина алу міндетім деп білді. Сол себепті өз шешімі бойынша екпе салдырды. Енді біз еш уайымсыз жүреміз, өйткені індетке қарсы шараны қабылдадық.
Санаулы күндерден соң жаңа оқу жылы басталады. Балалардың бұрынғыдай үйден онлайн сабақ оқымай, мектепке барып қалыпты білім алуын бәріміз де қалаймыз. Ол үшін не істеу керек? Адамдардың барлығы дерлік вакцина алу керек. Сонда балаларымыздың денсаулығына да қауіп төнбейді. Барша ата-аналарды індетке қарсы екпе алып, өз денсаулығымызды, өмірімізді сақтап қалуға, үйдегі балаларымыздың тағдырына, болашағына бейжай қарамауға шақырамын.
Екпе алу – індетті жеңудің жалғыз жолы. Тезірек коронавирус инфекциясын жеңгіміз келсе, бәріміз бір адамдай жұмыла әрекет етіп, індетсіз, уайым-қайғысыз жарқын болашаққа қадам жасайық.
Айман НҰРАХМЕТҚЫЗЫ,
№12 орта мектеп-гимназиясының химия пәні мұғалімі
Талдықорған қаласы
Алматы облысы
