Талдықорғанда барлығы 620 заманауи коттедж бой көтереді. Тамыз айының екінші жексенбісі — Құрылысшылар күнінде облыс орталығына сән берген үйлердің қалай бой көтеріп жатқанына тоқталуды жөн көрдік.
Тотыдайын таранған, сұңқардайын сыланған Талдықорғанның қай тұсына назар аударсаң да айрықша сұлулығымен көз тартатын әсем ғимараттар мен сарайлардың, көпқабатты тұрғын үйлер мен өнеркәсіптік кешендердің көптеп салына бастағанына куә боласың. Жасыл желекке оранған қаламыз жыл сайын бой түзеп, жаңарып заманға сай мекемелер бой көтеріп, жаңа ғимараттардың саны көбеюде. Басқа шаһарлардан ерекшеленіп тұрған қаламыздың көрінісі көпшіліктің қуанышын еселей түседі. Жер жаннаты Жетісудың жыл өткен сайын жаңаруы, ең алдымен, құрылысшылардың ерен еңбегі!
Жетісу құрылысшылары облыс тұрғындарының баспана мәселесін шешу үшін қарқынды жұмыс істеуде. Оған Талдықорғанда жыл сайын қосылатын шағынаудандар дәлел. Соңғы бес жылда облыс орталығында бұрын-соңды болмаған құрылыс ауқымы мен қарқыны байқалды. Негізгі күш коттеджді қалашық пен оңтүстік-батыс тұрғын алабына салынған.
Жалпы, жоба бойынша жақын арада Алматы тас жолының бойында 620 заманауи коттедж бой көтереді. Айта кетейік, 2019 жылдан бері қалада 35 мың шаршы метрден астам тұрғын үй салынып, 400-ге жуық отбасы шаңырақ шаттығына бөленді. Облыс әкімінің бастамасы бойынша тұрғын үй бөлу кезінде көпбалалы отбасыларға, аз қамтылған азаматтарға, жалғызбасты аналарға, ерекше қажеттіліктері бар адамдарға, яғни, халықтың әлеуметтік осал топтарына басымдық беріледі.
Жақын арада бұл қалашықта 900 орынды жаңа мектеп пен 300 орынды балабақша ашылады деп жоспарлануда. Оған ауданы 300 шаршы метрден асатын стадион құрылысын қосыңыз. Алаң аумағында футбол, баскетбол және волейбол ойнауға мүмкіндік туады. Балаларға арналған ойын алаңдары да ашылады. Уақыт өте келе саяжай қауымдастығында барлық қажетті инфрақұрылымдық объектілер пайда болады, оның ішінде, орман мен саябақ екпелері бар.
Қаланың оңтүстік-батыс аймағына келетін болсақ, қазір мұнда отызға жуық үй салынып жатыр. Олардың ішінде әр түрлі биіктіктегі көп корпусты кешендер мен әкімшілік ғимараттар бар. Жұмысқа «Риголит» ЖШС, «Стройсервис-97» ЖШС және «TsA NiPi TransNeft» ЖШС сияқты ірі мердігерлік компаниялар тартылды. Құрылыс уақытын тапсырыс беруші Талдықорған қалалық құрылыс бөлімі бақылайды. Конструкторлық және техникалық бақылауды жергілікті мамандандырылған фирмалардың өкілдері жүзеге асырады.
Айдар ҚАЛИЕВ
Алматы облысы
