Қарасай ауданында жол апатынан қайтыс болған ерлі-зайыптылардың туыстары оқиға куәгерлерін іздеуде. Олардың айтуынша, көз жұмған келіншектің аяғы ауыр болған.
«06.07.2021 жылы түнгі сағат бір шамасында Қаскелең тас жолының жоғарғы жағында, Хамма PARK мейрамханасына қарама-қарсысында жол апаты болды. LAND KRUZER 100 көлігінің жүргізушісі жолдың қарсы бетіне шығып, TOYOTA AVENSIS көлігімен бетпе-бет соқтығысқан! AVENSIS «Е»-нің 1997 жылғы жүргізушісі (23 жаста) және 1994 ж.ылғы жолаушысы (27 жаста) сол жерде қайтыс болды. А.жолаушының аяғы ауыр болған, жүктілік мерзімі — 3 айлық», — делінген әлеуметтік желіде жарияланған хабарламада.
Хабарламада қылмыстық іс қозғалғаны, ҚР Қылмыстық кодексінің 345-бабы, 4-тармағы бойынша жол апатына кінәлі азамат Қаскелең қаласының уақытша ұстау изоляторына қамалғаны, алайда 2 күннен кейін қандай да бір жолмен оның босып шыққаны айтылады.
«Өздеріңізден кінәлі адамды түрмеге қамауға көмектесулеріңізді сұраймыз, оның өзі түгілі ата-анасы, тіпті, туыстары да алдымызға келіп, кешірім сұрамады!» — делінеді жазбада.
Алматы облыстық полиция департаменті апатқа кінәлі тергеліп жатқанын, оның босатылмағанын хабарлады. «Аталған жол-көлік оқиғасы ағымдағы жылдың 6 шілдесінде сағат 00:10 шамасында Алматы-Жандосов-Бесмойнақ тас жолында орын алды. Тас жолдың бойымен шығыс бағытқа бет алған Toyota-Land Cruiser автокөлігінің 18 жастағы жүргізушісі, 25 шақырымдық жолда рөлге ие бола алмай, жолдығ қарсы бетіне шығып кетіп, Алматы қаласының 23 жастағы тумасы басқарған Toyota-Avensis автокөлігімен соқтығысқан. Жазатайым оқиға салдарынан Toyota Avensis автокөлігінің жүргізушісі мен оның 26 жастағы жолаушысы сол жерде қайтыс болды», — делінген zakon.kz сайтына шыққан хабарламада. Сондай-ақ, Toyota Land Cruiser автокөлігінің 18 жастағы жүргізушісіне қатысты ҚР Қылмыстық кодексінің 345-бабы, 4-тармағы бойынша қылмыстық іс қозғалғаны айтылады.
«ЖЕТІСУ-АҚПАРАТ»
