Еңбекшіқазақ ауданында қарызы үшін жас жігіт өзінің досын соққыға жықты. Бұл туралы «Жетісу» газеті хабарлады.
Еңбекшіқазақ аудандық полиция бөліміне Есік қаласында орналасқан ауданаралық көпсалалы аурухананың қабылдау бөліміне әртүрлі дене жарақатымен 19 жастағы жергілікті тұрғынның түскені туралы хабарлама келген. Аталған дерек ҚР Қылмыстық кодексінің 107-бабы, 1-бөлігі бойынша тіркелді.
«Жүргізілген жедел іздестіру іс-шараларының нәтижесінде тәртіп сақшылары күдікті — 19 жастағы жәбірленушінің досын анықтап, ұстады. Қылмыстық істі тергеп-тексеру барысында жәбірленушінің күдіктіден қарызға ақша алғаны және оны уақытында қайтармауы салдарынан күдіктінің досының үйіне іздеп барып, әңгімелесу барысында оны қасақана соққыға жыққаны белгілі болды. Орын алған деректің басқа жайттары ҚР Қылмыстық кодекстің 201-бабына сәйкес, жарияланбайды», — деді Еңбекшіқазақ АПБ бастығының бірінші орынбасары, полиция полковнигі Жақсылық Алтынбаев.
Қазіргі уақытта аталған оқиға бойынша сот-медициналық сараптамасы тағайындалып, қылмыстық іс бойынша тергеу амалдары жүргізілуде.
«ЖЕТІСУ-АҚПАРАТ»
Сурет — ғаламтордан
