Талдықорған бүгінде ел қызыға көз тіккен, қырмызыдай құлпырған, дәулеті мен сәулеті келіскен әсем де әдемі қалаға айналды. Оны жұртшылық айрықша мақтан етеді, көркіне сүйсіне қарап, шаттанады.
Қаламыздың осыдан жиырма жыл бұрынғы кезі әлі көз алдымда. Облыс әкімшілігінің орталығы Алматыда болғанда мен аймақ басшысы Заманбек Нұрқаділовтің кеңесшісі қызметінде жүрдім. Талдықорғанға келмес бұрын облыс әкімі маған бірнеше жауапты қызмет ұсынды. Бірақ келіспедім. Содан соң Заманбек Қалабайұлы Талдықорған қалалық төтенше жағдайлар басқармасының басшысы болуға ұсыныс білдірді. Ол кезде әкімнің бірінші орынбасары Серік Үмбетов болатын. Сол кісімен барып ақылдастым. Серік Әбікенұлы: «Нәке, Талдықорған сізге жақсы таныс. Жатқа білесіз. Сондықтан, барғаныңыз дұрыс. Ерте ме, кеш пе, бәріміз сол жақта қызмет етеміз ғой», – деді. Осы сөз жүрегіме ерекше сенім ұялатты. Іштей облыс әкімшілігінің орталығы Талдықорғанға көшіп келетін шығар деп ойладым. Бұл менің ғана емес, дүйім жұрттың да тілегі еді.
Талдықорғанға алғаш келгенімде өңір тұрмысы нашар еді. Қарапайым халық жұмыс іздеп, басқа жаққа көшіп жатқан кез. Тұрғындардың қуанышына орай, екі жылдан кейін Елбасының Жарлығымен Алматы облысы әкімшілігінің орталығы Талдықорғанға ауысты. Жайдарман жаңалықты естіген елдің қуанышында шек болмады. Жұртшылық Алматыдан келген қонақтардың алдынан шығып, қазақтың салтымен жеті нанын алып, шашуын шашып күтіп алды.
Көшті Шалбай Құлмаханов бастап келді. Талдықорғанға келгеннен-ақ басшылардың барлығы өз салаларының кәсіби мамандары екенін көрсетіп, іскерлігімен танылды. Әрқайсысы қаланы көркейту мақсатында тыным таппай, тәулік бойы жұмыс жасады. Талдықорғанда еңбек майданы болды десек, артық айтқандығымыз емес. Жыл өткен сайын қаланың бойына қайта қан жүгіріп, мәртебесі биіктей түсті. Біз де өзіміздің үлесімізді қостық. Аяқастынан туындаған төтенше жағдайды уақытылы ауыздықтап тұрдық.
«Жұмыла көтерген жүк жеңіл», дейді дана халқымыз. Қарапайым халық та қолынан келген көмегін аямады. Талдықорғанды жаңғырту мақсатында барлық жұмысты ел болып иық тірестіріп, білек біріктіріп істеген соң өңіріміз жайнай түсті. Көше тазалаудың өзіне «Біз қаламызды гүлдендіреміз!» деген ұранмен шықтық. Көгалдандыру, абаттандыру, сенбілік жұмысқа бүкіл халық атсалысты. Өңірімізде «Үш бәйтерек» қоғамдық қоры құрылып, халық қаражатына Ескелді би, Балпық би, Қабылиса жырау, Қадырғали Жалаири сынды бабаларымыздың ескерткіштері орнатылды.
Бұл елдің қуанышын білдіреді. Өлгеніміз тіріліп, өшкеніміз жанды. Сонымен қатар, үлкен мешіт бой көтерді. Мектептер мен әсем ғимараттар салынып, құрылыс саласы қарқынды дамып, қаланың әлеуеті күн санап артты. Жаңа жұмыс орындары ашыла бастаған соң жан-жаққа тарап кеткен қала тұрғындарының тоқсан пайызы қайта оралды. Үкіметтен берілген қаржы тиімді пайдаланылып, аз ғана жылдың ішінде қаламызда қыруар шаруа атқарылды.
Иә, өңірімізде осы күнге дейін ҚР Президенті Қасым-Жомарт Тоқаевтың «Сабақтастық, әділдік, өрлеу» деген саясаты сәтімен жалғасып келеді. Сондықтан, жиырма жыл ішінде облысты басқарған әкімдердің барлығының ерен еңбегін бағалаған жөн. Осы жұмыстардың барлығы өз жүйесін таба берсе, қаламыз әлі де көркейе түсетіні анық.
Наурыз ҚЫЛЫШБАЕВ,
Алматы облысының
Құрметті азаматы
