Кеген аудандық орталық ауруханасының екінші қабатынан екпе салуға арналған бірнеше бөлме дайындалып, жұмыстарын жүйелі жүргізіп келеді. Емхана бөлімінің аға мейірбикесі Жадыра Омарованың бастауымен екпе салатын бөлім жұмысын көзімізбен көрдік.
Емхана ішінде екі егу бөлмесі, он бақылау төсегі дайындалған. Егу бөлмесі талаптарға сай жабдықталған арнайы шкафпен, тоңазытқыш, термоконтейнермен, өзге де құрал-жабдықтармен қамтамасыз етілген. Екпе салдыруға келушілерді тәжірибелі дәрігер Айгерім Жүнісова қабылдап, денсаулық жағдайын біледі. Осы бөлімдегі мейірбикелер А. Үмбетбаева,Қ. Сейітжанова, Г. Нұрғожаевалардың еңбектері елеулі. Олар екпе салдыруға ниеті бар адамдарға екпенің екі бөліктен тұратындығын, оның аралығы үш аптаны құрайтынын айтып, қажетті парақшаларды беріп отырады.
Аудандық емхананың екпе бөлімінде соңғы аптаға дейін 750 адам дәрігер қабылдауында болып, 900 адам «Спутник-V» немесе Гам-Ковид-Вак деп аталатын екпені салғызды. Оның ішінде медицина қызметкерлері, мемлекеттік қызметкерлер, ұстаздар мен мәдениет саласының өкілдері бар. Жалпы, аудандағы барлық саланың қызметкерлері, жекелеген тұрғындар өз еріктерімен екпе алуда.
– Екпе салатын бөлімде келушілерге барлық жағдай жасалған. Әркім түсіністік танытып, өз еріктерімен келіп салғызып алғандары жөн. Коронавирус індетінен аулақ болуды, денсаулығымызды, ертеңгі күнімізді ойласақ, екпе салғызуға мүдделі болайық, – дейді аудандық емхананың меңгерушісі Берік Әлиев.
– Мен өз еркіммен екпе салғыздым. Денсаулығым үшін, денсаулығыма тигізетін оңды әсері үшін салғыздым. «Спутник-V» вакцинасы туралы интернет көздерінен толықтай танысып, тиімділігіне көзімді жеткіздім. Мемлекет тарапынан қолға алынып жатқан игі дүниеден сырт қалуға болмайды, – дейді аудан әкімі аппаратының ұйымдастыру бөлімінің басшысы Руслан Уәлиұлы. Аудан орталығындағы С. Серкебаев атындағы орта мектеп-гимназиясының мұғалімі Шұғыла Өрісбай да оң пікір білдірді.
Емханада КВИ-ге қарсы вакцинаның екінші кезеңі де басталып, жалғасын табуда. Вакциналау жұмыстары жүйелі жүргізіліп келеді.
