Халықаралық әйелдер күні мерекесіне орай облыстық білім және ғылым қызметкерлерінің кәсіподақ ұйымы салтанатты қабылдау өткізді. «Әйел – Ана, әйел – өмір, әйел – жыр» атты мерекелік шараға мекеме басшылары, сала ардагерлері, қоғамдық жұмыста белсенділік танытқан кәсіподақ мүшелері қатысты. Шарада облыстық білім және ғылым қызметкерлері кәсіподақ ұйымының төрағасы М. Төлепбергенов нәзік жандыларды мерекемен құттықтады.
– Осы бір көптен күткен шырайлы күн көңілдеріңізді нұрға, жүректеріңізді жырға бөлесін дегім келеді, – дей келе ол бірқатар кәсіподақ үздіктерін «Қазақ- стандық білім және ғылым қызметкерлерінің кәсіподағына сіңірген еңбегі үшін» төсбелгісімен, салалық кәсіподақтың және облыстық кәсіподақтар орталығы облыстық ұйымының Құрмет грамоталарымен марапаттады.
Жиын барысында облыстық жастар саясаты жөніндегі басқарманың бөлім басшысы Ұ. Боранбайұлы және Талдықорған қаласындағы №45 «Арман» балабақшасының меңгерушісі С. Сейілғазинова әріптестеріне ізгі тілектерін арнады.
Облыстық кәсіподақ ұйымының әйелдер істері жөніндегі комиссиясының төрайымы Ә. Ілиясова «Ақылшы ене, ибалы келін» атты отбасылық байқауының жеңімпаздарын таныстырды. Байқауға 11 бейнеролик түсіп, әділқазылар алқасының қарауына ұсынылған. Нәтижесінде жүзден жүйрік шыққан ене мен келін Панфилов ауданынан Ү. Таңатарқызы, С. Көбенбаева І орынға ие болды. Текелі қаласынан қатысқан Ш. Рахметбай мен А. Дорводханға ІІ орын берілсе, көксулық А. Байменова мен Г. Жұмәділдә және талдықорғандық З. Найтбаева мен А. Найзагерова ІІІ орынды өзара бөлісті. Жеңімпаздарға облыстық ұйымның дипломдары мен бағалы сыйлықтары табыс етілді.
Салтанатты жиында Қ. Байсейітов атындағы саз колледжінің білімгерлері өнерлерін көрсетіп, көпшілікке мерекелік көңіл-күй сыйлады.
Алма ЕСЕНБАЙ
