Облыстық дене шынықтыру және спорт басқармасы алқа мәжілісін өткізді. Жиынға аудандық спорт бөлімдерінің басшылары мен спорт мектептерінің директорлары қатысты.
Жиынды жүргізіп отырған дене шынықтыру және спорт басқармасының басшысы Нұрбақыт Теңізбаев келген қонақтарды таныстырып, жиынның регламентін атап өтті. Алқа мәжілісіне облыс әкімінің орынбасыры Рустам Әли, Қазақстан Республикасы сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) Алматы облысы бойынша департаменті басшысының орынбасары Жандос Жұмабаев, «Қазақстандық салалық мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің Алматы облысы бойынша филиалының төрайымы Сәуле Ахмадиева қатысты.
Мәжілісте төрт мәселе қозғалды. «Талдықорған қаласының дене шынықтыру және спорт бөлімі» мемлекеттік мекемесінің бұқаралық спорт түрлерін дамыту мен салауатты өмір салтын насихаттау мақсатында 2020 жылы атқарылған жұмыстар туралы бөлім басшысының м.а. Ільяс Сағымбеков баяндады.
«Өркен» балалар мен жасөспірімдер спорт мектебі» коммуналдық мемлекеттік мекемесінің жоғары жетістіктер спортын дамыту мақсатында 2020-2021 оқу-жылдары атқарылған жұмыстар туралы мектеп директоры Рамиль Мұратов, «Талдықорған қаласының №2 балалар мен жасөспірімдер спорт мектебі» коммуналдық мемлекеттік мекемесінің жоғары жетістіктер спортын, бұқаралық спорт түрлерін дамыту мен салауатты өмір салтын насихаттау мақсатында 2020-2021 жылдары атқарылған жұмыстар туралы мектеп директоры Қапалбай Әділбеков сөз сөйледі және әртүрлі мәселелер бойынша әңгіме қозғалды.
Баяндамашылардың алдында облыста спортқа еңбегі сіңген бірқатар қызметкерлер арнайы төсбелгімен марапатталды.
Өз кезегінде облыс әкімінің орынбасары Рустам Әли облыста спорт саласы бойынша атқарылып жатқан жұмыстарға кеңінен тоқталып, алдағы жоспарлармен таныстырып өтті. Алдағы жылы ауылдық жерлерге дене шынықтыру-сауықтыру кешендерін салу кезең-кезеңімен жүзеге асатынын жеткізді. Сонымен қатар, мемлекеттің имиджі саналатын алдағы Олимпиада ойындарында жолдама ұтып алған спортшыларымыз жүлделі орыннан көріну үшін барлық жағдайды туғызып, олардың оқу-жаттығуына көңіл бөлуді тапсырды.
Бұдан кейін Жандос Жұмабаев сыбайлас жемқорлыққа қарсы жұмыс жайлы әңгіме қозғады. Жемқорлықтың алдын алу және сыбайластықпен істі болған азаматтардың қандай жауапкершілікке тартылатындығы жайлы толықтай түсіндіріліп, заман індеті аталатын жемқорлықты жоюға бірлесе жұмыс істеуді және ондай қылмыстық әрекеттерге жоламауды қадап айтты.
Жауапты тұлғалардың сөзінен кейін баяндамашылар сөз алып, өздері басқарып отырған мекемелердің жұмысы жайлы қысқаша ақпар берді. Баяндамашыларға басқарма басшысы Нұрбақыт Молдахметұлы бірқатар сын-ескертпелер айтып, жұмысты ширатуды тапсырды. Сонымен қатар, бұқаралық спортқа көңіл бөліп, спортпен шұғылданатын бала санын көбейтуді тапсырды.
Жалпы, спорт саласы бойынша тек өткен жылдың қорытындысы бойынша барлығы 853 жүлде келген. Соның ішінде 292-сі – алтын, 258-і – күміс, 303-і – қола медаль. Жыл ішінде 20 халықаралық спорт шебері, 124 спорт шебері, 375 спорт шеберлігіне кандидат, 166 бірінші разрядты спортшы дайындалды. Өңір спортшылары Токиодағы XXXII Жазғы олимпиада ойындарына қатысуға 8 лицензия ұтып алған. Олардың арасында садақ атудан Санжар Мұсаев, Денис Ганькин, Ильфат Абдуллин және командалық бір жолдама, жеңіл атлетикадан Айман Ратова, грек-рим күресінен Асхат Ділмұхамедов, велоспорттан Сергей Пономарев, ауыр атлетикадан Зульфия Чиншанло бар.
Алқа мәжілісінің соңында әртүрлі мәселелер қозғалып, оларға тұшымды жауап қайтарылды.
Ришад ТҰРҒАНБАЙ
