Алакөл ауданында қар құрсауында қалған 3 адам құтқарылды. Бұл туралы «Жетісу» газеті хабарлады.
Түстен кейін сағат 14:54-те Алматы облысы төтенше жағдайлар департаментіне Алакөл ауданы, Ырғайты ауылдық округінің Қарауылтөбе учаскесінде жолаушылары бар «УАЗ» маркалы автокөлік қар құрсауында қалып қойғаны туралы хабарлама келіп түсті.
Шақыру орнына Ақши ауылынан Алакөл өңірінің жедел-құтқару жасағының құтқарушылары жіберілді. Кейіннен белгілі болғанындай, 3 ер адам «УАЗ» автокөлігімен шаруа қожалығынан қайтып келе жатқан жолда қар құрсауына түсіп, өз бетінше қозғалысты жалғастыра алмай қалған.
18 ақпанда Алакөл ауданында екпіні 23 м/с-қа дейін жететін қатты жел, боран соққан. Жол нашар көрінген.
Жедел қабылданған шаралар барысында Алматы облысы ТЖД құтқарушылары қар құрсауынан 3 адамды құтқарды. Құтқарылғандар Көктұма станциясына жеткізілді, оларға медициналық көмек қажет болған жоқ.
Құтқару операциясына 3 құтқарушы мен 1 жоғары өтімді «ТРЭКОЛ» техникасы жұмылдырылды.
Алматы облысы ТЖД азаматтардан елді мекеннен шыққан кезде сақтық ережелерін ұстануды сұрайды. Алыс жолға шығар алдында сол аймақтағы ауа райы болжамымен танысып, төтенше жағдайда сізге көмектесетін барлық қажетті заттарды өзіңізбен бірге алып жүруге кеңес береміз. Құтқару қызметінің бірыңғай телефоны — 112.
«ЖЕТІСУ-АҚПАРАТ»
