Талдықорғандағы спорт интернатының оқушылары ақпан айы бастала салысымен-ақ түрлі жарыстарға барып, жүлдемен оралды.
Велоспорт. Шымкентте велоспорттың маутинбайк түрінен жастар және ерлер мен әйелдер арасында ел чемпионаты өтті. Жарыста 9 облыс және Алматы, Шымкент, Нұр-Сұлтан қалаларынан 12 команда қатысып, 83 велошабандоз бақ сынасты. Бұл сында облысымыздың намысын қорғаған спортшылар үмітті ақтады. Атап айтсақ, әйелдер арасында Анжела Соловьева қос қола медальға қол жеткізсе, жастар арасында Виолетта Казакова алтынмен апталып, күміспен күптелді. Алексей Фефелов пен Мадина Жұртыбаева да қос-қостан қола медальді қанжығаласа, Никита Галкин күміспен күптелді.
Күрес. Талғар қаласында грек-рим күресінен жасөспірімдер арасында облыс чемпионаты өтті. Додаға әр өңірден іріктеліп келген 150-ге жуық жас спортшылар қатысты. Нәтижесінде спорт-интернат балуандары Нұрзат Дүйсемхан, Диас Қалтай, Әділет Қажыбеков, Расул Тұрсынов өз салмақтарында чемпион атанды. Ал Сұңғат Абитай, Мардан Жақсылық, Айбол Айтқали, Айбек Байсүгіров тұғырдың екінші сатысынан көрінсе, Амангелді Калибай, Дәулет Көбентаев, Нұрсұлтан Несипбай, Азамат Ерболов,
Руслан Жапар, Ержан Леспек, Адлет Нұрболсын қола жүлдені қанағат тұтты.
Айдар НАЗАРҰЛЫ
