Өткен жылы Талғар ауданында 366 кәсіпорын жұмыс істеген, оның біреуі ірі, 87-сі орта, 52-сі шағын кәсіпорындар санатында. Нәтижесінде, 2374 адам еңбекпен қамтылған.
– Былтырдан басталған пандемияның салдары кәсіпорындардың, бизнес нысандарының жұмысының жандануына кері әсерін тигізді. Десе де, ауданымыздың кәсіпорындары карантин талаптарын сақтай отырып, жұмыстарын ширата түсудің нәтижесінде жылды жақсы көрсеткіштермен қорытындылады. Жаңа нысандар ашылып, өндіріс өрісі кеңейді. Атап айтсақ, былтыр ауданда 4 дүкен, 2 қоғамдық тамақтандыру орны, 3 автокөлік жуу, ТЖО, бизнес орталығы, сауықтыру кешені, монша сынды 13 шағын және орта бизнес объектісі ашылып, 110 адам жаңа жұмыс орындарымен қамтамасыз етілді. Тартылған инвестицияның жалпы көлемі 534,6 млн. теңгені құрады, – деген аудандық кәсіпкерлік бөлімінің сектор меңгерушісі Жанар Әмірханова «Бизнестің жол картасы – 2025» бағдарламасы аясындағы жаңа жобалар биыл да жалғасын табатынын атап өтті.
Жалпы, өткен жылы аталған бағдарлама бойынша ауданда жалпы сомасы 3,3 млрд. теңгеге 62 жоба қаржыландырылып, оның ішінде 31 жоба 2,9 млрд. теңгеге пайыздық үстемемен субсидияландырылса, 31 жоба 390,4 млн. теңгенің несиесіне кепілдік алғандығын атап өтті.
Ұлбосын ИСАБЕК
