Қыс мезгілінде аппақ қар үстінде шаңғы тепкенге жетер ештеңе жоқ! Шаңғымен желдей есіп, таудан төмен құлдилай сырғанаудың өзі үлкен дүние. Тілмен айтып жеткізгісіз ләззат пен қуаныш, спорттың тамаша түрі, жаныңды сергітіп, көңіліңді шарықтатып, қиялыңды қияға көтеріп әкететін құдірет десек, артық айтпағандық. Шаңғымен сырғанауды мектеп қабырғасында жүрген жас- өспірімдердің жақсы көргені, жандарымен қалағаны, соған ықылас-пейілдерін түсіргені шын мәнінде қуантарлық, қолдарлық дүние.
Райымбек ауданындағы Сарыжаз орта мектебінің жанында көптеген спорт түрлерінен бөлек шаңғы секциясы жұмысын жүргізеді. Таулы өңірде ұзақ болатын маусым – қыс мезгілі десек, шаңғымен айналысудың жөні бар, жолы бөлек. Ең бастысы, мектепте шаңғымен шұғылдануға толымды тәлім мен тәрбиесін беретін тәжірибелі жаттықтырушылар бар. Е. Маратов, М. Совет, М. Абай секілді дене тәрбиесі пәнінің оқытушылары шаңғы тебудің шынайы шеберлері. Шаңғыдан аудандық, облыстық, республикалық жарыстардың жеңімпаздары. Мектептегі балғын шаңғышы қыздар мен ұлдар аталған ұстаздарымен бірге шаңғымен сырғанауға, жаттықтыруға бірге шығып келеді. Олардың ағаларынан үйренерлері көп. Бір сөзбен айтқанда, Сарыжаз ауылының шаңғышылары аудандық, облыстық жарыстың алдын ешкімге берген емес. Желдей есіп әрдайым бірінші келеді. Аудандағы шаңғышыларды бірден-бір жаттықтыратын орын осы ауылда. Шаңғышылардың ордасы да осы ауылда десек, артық айтпаймыз.
Қанат БІРЖАНСАЛ
