Журналистер үйінде Алматы облыстағы эпидемиологиялық жағдай және COVID-19 індетіне қарсы күрес бойынша баспасөз конференциясы өтті. Оған Алматы облыстық санитарлық эпидемиологиялық бақылау департаменті басшысының орынбасары Асхат Чарапиев және облыстық денсаулық сақтау басқармасы басшысының орынбасары Арман Жансеңгіров қатысты. Спикерлер Алматы облысы бүгіннен бастап «жасыл аймаққа» өткенін айтты. Бұл туралы «Жетісу» газеті хабарлады.
Жиында спикерлер Алматы облысының жасыл аймаққа өтуі өңірдегі эпидахуалдың тұрақтала бастауымен байланыстырды. Алайда инфекциялық сырқатқа шалдығушылар саны әлі толастамай тұр. Осыған байланысты жауапты мекеме өкілдері ауруханадағы төсек санының 1138-ден 1300-ге дейін артқандығын, сонымен қатар, коронавирустық инфекцияға күдікті және расталған адамдар үшін реанимациялық төсек 124-тен 135-ке дейін көбейгендігін мәлім етті.
Коронавируспен күреске барлығы жергілікті бюджеттен 13,8 млрд.теңге, оның ішінде, екінші толқынға дайындыққа 8,8 млрд.теңге бөлінген.
Арман Серікұлының айтуынша, медициналық ұйымдарда 17 компьютерлік томограф, 53 рентген аппараты, 534 өкпені жасанды желдету қондырғысы жұмыс істейді. Оның ішінде балалар үшін – 70, ересектер үшін – 464 қондырғы орнатылған.
Облыстың 17 ауруханасы оттегі станцияларымен қамтамасыз етілген. Бұл мақсатқа жергілікті бюджеттен 818,2 млн.теңге бөлінді. Сондай-ақ, оттегі концентраттарының саны 1350 данаға жетті. Мемлекет басшысының тапсырмасына сәйкес, 26 реанимациялық бөлімше қажетті құралдармен жабдықталды.
Жалпы, медициналық жабдықпен қамтамасыз ету 79-дан 89 пайызға дейін артты. Барлығы 180 «Жедел жәрдем» көлігі, сондай-ақ, 12 жылжымалы медициналық кешен сатып алынды. Бригадалар саны 205-ке дейін көбейтілді.
— Талдықорғанда 200 төсектік жаңа жұқпалы аурулар ауруханасы пайдалануға берілді. Жағдайы ауыр науқастар мен балаларға арналған көпсалалы ауруханалар базасында 4 ахуалдық орталық құрылды. Қажет болған жағдайда 5280 төсек-орын пайдалануға беріледі. Коронавирустық пневмонияны ерте кезеңде анықтау үшін жаңа цифрлық жүйе енгізілді. Облыс ауруханаларында жеке қорғану құралдары мен дәрілік заттардың екі айлық қоры бар. Бұдан басқа, халықтың әлеуметтік осал топтары үшін жергілікті бюджет есебінен 92,1 млн.теңгеге вирусқа қарсы препараттар сатып алынды. Облыста 1,3 млрд.теңгеге тұрақтандыру қоры құрылды. Дәрілік заттар мен медициналық бұйымдардың 41 түрі «INKAR» ЖШС қоймаларына бөлінген, – деді Арман Серікұлы.
Бүгінде аталмыш індетті емдеуге 3455 медицина қызметкері, оның ішінде, 851 дәрігер жұмылдырылған. Олардың 447-сі терапевт, 38-і инфекционист, 143-і реаниматолог, 8 нефролог, 8 пульмонолог 12 трансфузиолог, 98 невролог, 97 әртүрлі маман-дәрігер. Сондай-ақ, 2604 орта және кіші медицина персоналы тартылды.
Облыста 10 зертхана жұмыс істейді, онда тәулігіне 6,3 мыңға дейін зертханалық зерттеу жүргізіледі.
Жиын барысында журналистер вакциналау барысында атқарылып жатқан жұмыстар жайлы сұрады. Спикерлер бұл орайда егу кабинеттерінің жабдықталып жатқанын және дәрігерлерді онлайн оқытудың басталып кеткенін айтты. Қос спикер вакцинаны өздері бастап салдыратындарын жеткізді.
Гүлжан МҰҚАШҚЫЗЫ
Алматы облысы
Сурет — ғаламтордан
