12 қаңтар күні Алматы уақытымен кешкі 19 сағат 21 минутта жер сілкінісі тіркелді. Бұл туралы «Жетісу» газеті Алматы облысының төтенше жағдайлар департаментіне сілтеме жасап хабарлады.
Жер сілкінісінің эпицентрі — Алматы қаласынан 292 шақырым жерде, Алматы облысының Панфилов ауданында орналасқан. Жер сілкінісінің энергетикалық класы — 11.7. MPV магнитудасы — 4.2. Эпицентрдің координаттары 44.45° с.ш. 80.10° в.д. Тереңдігі — 5 шақырым.
Жаркент қаласының тұрғындарына жер дүмпуі 2-3 балл болып сезілді. Құрбан болғандар мен қираған нысандар туралы ешқандай ақпарат түскен жоқ.
Жер сілкінісі кезінде мынадай ережелерді қаперде ұстаңыз:
— ғимараттан шығыңыз (сіздің иелігіңізде 15-20 секунд);
— жоғарғы қабаттарда қалған жағдайда баланы құшақтап алып, есік ойығының орнына немесе іргелі қабырғалардан құралған бұрышта тұрыңыз;
— ешқандай жағдайда терезе жанында тұрмаңыз және балкондардан секірмеңіз.
— ғимараттардан, құрылыстардан, бағаналар мен қоршаулардан алыс тұрыңыз;
— үйге кірмеңіз: дүмпулер қайталануы мүмкін;
— жеделсатыны пайдаланбаңыз;
— сіріңке, шам жақпаңыз;
— электр сымдарына қол тигізбеңіз;
— зардап шеккендерге алғашқы көмек көрсетіңіз.
«ЖЕТІСУ-АҚПАРАТ»
