«Диас» бөбекжай-балабақшасында «Абай – біздің бабамыз» атты шара өтті.
«Күншуақ» мектепалды даярлық тобымен бірлесе өткізілген шараға балабақша қызметкерлері және тәрбиеленушілер қатысты. Шара барысында «Ақан-ата» ЖШС «Диас» бөбекжай-балабақшасының меңгерушісі А. Рамазанқызы сөз сөйлеп, әр жас ұрпақ кішкентай кезінен Абай атаның әнімен сусындап, жырларынан нәр алатынын әңгімеледі. Абай атамыз айтқандай, кішіге мейірімді, досыңа қайырымды, еңбексүйгіш, шыншыл да қамқор болсаң, өсе келе ата-анаңның, Отаныңның мақтаны боласың деген тағылымды ой өрбітті. Сөзінің соңында ол белсене қатысқан бүлдіршіндерге алғыс айтып, болашақ өміріне сәттілік тіледі.
Қамшының сабындай ғана қысқа өмірде өшпес із, өлмес өсиет қалдырып кеткен ақынның өзі:
Өлді деуге бола ма, ойлаңдаршы,
Өлмейтұғын артына сөз қалдырған, – деп жырлайды.
Абай атамыздан ғибрат алып қана қоймай, оның әрбір сөзіне өмірлік құндылық ретінде қарауымыз керек. Қазақ сөзінің киесі қонған кез келгенімізге өмірлік бағыт-бағдар, ақыл қосушы тұлға – осы Абай. Балабақшада өткен шағын шараға қатысқандар біз Абай атаны жадымызда ұстаймыз деп тарқасты. Шараға қатысқан бүлдіршіндер мол тағылым алып қайтты.
Анар МАМЫРАЕМОВА,
«Ақан-ата» ЖШС «Диас» бөбекжай-
балабақшасының тәрбиешісі
Бақтыбай ауылы,
Ескелді ауданы
