Бүгін Талғар ауданында Алматы облысы бойынша 20-сыншы сервистік әкімдік ашылды. Бұл туралы «Жетісу» газеті хабарлады.
ҚР Президенті Қасым-Жомарт Тоқаевтың «Халық үніне құлақ асатын мемлекет» тұжырымдамасын жүзеге асыру мақсатында ашылған бұл іс-шараға ҚР Сыбайлас жемқорлыққа қарсы іс-қимыл агенттігі Алматы облысы бойынша департаментінің басшысы Ернар Мақажанов, аудан әкімінің орынбасары Ахмет Ашимахунұлы қатысты.
Бұған дейін аудан жұртшылығы құжат жұмыстарын бітіру үшін әкімшіліктің әр кабинетін аралап, табанынан тозатын еді. Енді «Open space» қағидаты бойынша жұмыс істейтін орталықтан бар жұмысын бітіріп шығу мүмкіндігі туып отыр.
— Облыстың барлық аудандарында ашылған сервистік әкімдікті алдағы уақытта ауылдарда да ашу жағы қарастырылады. Мұның халыққа тигізер пайдасы орасан. Бұл ашықтықты, қолайлылықты қамтамасыз етеді. Елді әуре-сарсаңнан арылтады. Сол себепті өз ісінің нағыз мамандары қызмет көрсетуге тиіс, — деген Ернар Әбсейітұлы мемлекеттік қызметкерлердің еңбегіне сәттілік тілей келе, жаңа ашылған орталықтың жұмысымен танысты.
Сервистік әкімдік жобасының қағидалары — мемлекеттік қызметтерді көрсететін мекемелерді бір жерде шоғырландыру. Бұл өз кезегінде қызмет алушылардың уақытын, күш-жігерін, қаржысын үнемдеуге мүмкіндік береді. Сонымен қатар, мұнда балалар алданатын ойын алаңы да жабдықталған.
— «Бір терезе» жүйесінде қызмет көрсететін сервистік әкімдікте 9 мекеме орналасты. Жалпы, ауданда 84 мемлекеттік қызмет көрсетілсе, соның 48-і осы жерде болады. Биыл 23 мекеме бойынша 39 мыңға жуық мемлекеттік қызмет түрі көрсетілді, — деген аудан әкімінің орынбасары Ахмет Ашимахунұлы сервистік әкімдіктің ашылуына екі ай мерзім кеткенін тілге тиек етті.
Сервистік әкімдіктен «Жетісу — адалдық алаңы» жобасымен жабдықталған азаматтарды қабылдау кабинеті орналасқан.
Осы күні ҚР Сыбайлас жемқорлыққа қарсы іс-қимыл агенттігінің Алматы облысы бойынша департаментінің басшысы Ернар Мақажанов алғашқы болып жеке және әлеуметтік мәселелері бойынша аудан тұрғындарын қабылдап, кеңес берді.
Тиімді орталықтың ашылатындығынан хабардар тұрғындардың біразы келіп, тиісті сауалдары бойынша мемлекеттік қызметкерлерге жүгініп, шаруаларының бір жерден шешім табатындығына ризашылықтарын білдірді.
Ұлбосын ИСАБЕК
Талғар ауданы
Алматы облысы
