Алматы облыстық мәслихатының кезектен тыс 63 сессиясы өтті. Онлайн режімінде өткен жиында бірнеше мәселе қаралды. Алғашқы мәселе «Алматы облысының 2020-2022 жылдарға арналған облыстық бюджеті туралы» №55-282 шешіміне өзгерістер мен толықтырулар енгізу барысында өрбіді. Жиынды облыстық мәслихат хатшысының міндетін атқарушы Серік МҰҚАНОВ жүргізді.
«Қазақстан Республикасы Үкіметінің 2019 жылғы 6 желтоқсандағы «2020-2022 жылдарға арналған республикалық бюджет туралы» Қазақстан Республикасының Заңын іске асыру туралы №908 қаулысына өзгерістер мен толықтырулар енгізу туралы №742 қаулысының жобасына cәйкес республикалық бюджеттен берілетін нысаналы трансферттердің сомасы жалпы алғанда 14,4 млрд. теңгеге азайтылды, оның ішінде ағымдағы нысаналы трансферттер 13,4 млрд. теңге болып отыр», – деді облыстық экономика және бюджеттік жоспарлау басқармасының басшысы Жомарт Әмірханов.
Жиында «Жұмыспен қамтудың 2020-2021 жылдарға арналған жол картасы» шеңберінде бағалы қағаздарды шығару есебінен қаржыландырылатын жобаларды 15,9 млрд.теңгеге азайту жоспарланғаны айтылды.
Басқарма басшысы өз сөзінде басқару органдарының материалдық-техникалық базасын нығайту және ұстауға жергілікті бюджеттен 29,1 млн.теңге бөлу ұсынылғаны жайында сөз етті. COVID-19 инфекциясының таралуына байланысты күн мен түнді алмастыра жұмыс істеген ішкі істер органдарының қызметкерлеріне сыйлықақы төлеуге республикалық бюджеттен 365,3 млн.теңге бөлінген. Баяндамашының айтуынша, денсаулық сақтаудың ағымдағы шығындарына жергілікті бюджеттен қосымша 903,6 млн.теңге бөлу жоспарлануда. Оның ішінде ПТР зертханасын сатып алуға 150 млн.теңге, дизель электр стансысын сатып алуға 7,2 млн. теңге қарастырылуда.
Тұрғын үй-коммуналдық шаруашылығы бойынша жергілікті бюджеттен шығыстарға 276 млн.теңге қарастыру жоспарлануда. Сессияда төтенше жағдай режимі кезінде коммуналдық қызметтер үшін халықтың төлемдерін өтеуге 73,3 млн.теңге, Қазақстан Республикасының Тәуелсіздік күніне арналған іс-шаралар өткізуге қосымша 7 млн.теңге бөлу жоспарланғаны сөз болды. Мұның сыртында ауылшаруашылығын дамыту, кәсіпкерлікті қолдау, халықты баспанамен қамтуға қаржы бөлінетін болып шешілді. Коронавирустық індетпен күресте жан алып, жан берген дәрігерлер қауымына да ақшалай қолдау көрсетілетіні айтылды.
Сессияда құқықбұзушылықтың алдын алу, облыс бойынша адамдарды шетке заңсыз әкетуге, сатуға қарсы күрес мәселелері жөнінде ведмоствоаралық комиссияның дербес құрамын бекіту жайы әңгіме өзегіне айналды.
Гүлжан ТҰРСЫН
Алматы облысы
Сурет ғаламтордан алынды
