Үлкен мүмкіндіктер мен жоғары әуелетке ие ауылға инвесторлар да үйір. Бүгінгі күні қолға алынған ауқымды жобаның бірі – Достық ауылдық округіндегі құрғақ порттың құрылысы. Облысымызда теңдесі жоқ Қорғас ШЫХО-ның бүгінгі тынысына қарап тамсануға да болады. Дәл осындай деңгейге көтеру және одан әрі асу мақсатында Достық ауылдық округінің аумағында 3 кезеңді жұмыс атқарылуда.
Қазіргі таңда бірінші кезең бойынша жоспарланған шаруалар басталып кетті. Көпфункционалды жүк тиеу терминалы «Dostyk Trans Terminal» ЖШС тапсырысы бойынша жүзеге асуда. Мердігер компания ретінде «ГлобалСтройСнаб» ЖШС бекітілген.
Нысанның алғашқы кезеңі бойынша 7,98 км. теміржолдың құрылысы тамыз айының басында басталған. 200 адам мен 54 техника жұмылдырылып, жұмыс өз ретімен жалғасуда. Теміржолдан бөлек контейнерлер сақтау алаңының да құрылысы қолға алынған. Жобаның жалпы аумағы 25500 шаршы метр. Сақтау және тиеу алаңында темірбетонды плиталар қойылуда. Сондай-ақ, су ұңғымалары мен жылу қазандығын, 700 текше метр су сыйымдылығы бар өртке қарсы резервуарлар орнату, сыртқы су құбыры желілері мен кәріз жүйесін реттеу, аумақты қоршау және көлік жолын салу сынды істер де осы бірінші кезеңде аяқталмақ.
– Қазіргі таңда бірінші кезеңдік жұмыстардың елу пайыздан астамын тамамдадық. Жоспар бойынша 2021 жылдың мамырында нысанды тапсырамыз. Қазір 200 адам құрылыс жұмыстарын жүргізуде. Оларға арналған жатақхана және асхана қызмет атқарып тұр. Қар түсіп, күн суытқанша ісіміз тоқтамайды. Қытайдан кіретін және өз аумағымыздағы теміржолдың құрылысын бірінші бастадық. Көршілес елден шыққан пойыздар осы жерде аялдап, ричстакерлер арқылы вагондар осында түсіріледі. Одан ары ел ішіне және Еуропа мемлекеттеріне жөнелтіледі, – дейді «ГлобалСтройСнаб» ЖШС өндірістік-техникалық бөлімінің инженері Қасымхан Айтымбет.
Аталған нысанның құрылысы еуропалық ірі логистикалық «Gebruder Weiss» компаниялар бірлестігінің құрамына кіретін австриялық «Xvise» компаниясы әзірлеген дизайн бойынша жүргізілуде. Мұнда Достық стансысында аналогы жоқ толық құрамды пойыздарды қайта тиеу орны, 1000 контейнерлерге дейін арналған ашық қоймалар, терминалдарды автоматтандыру, құжаттарды «бір терезе» қағидаты бойынша рәсімдеу сынды жұмыстар жүзеге аспақ. Одан бөлек, жобаға қолдау ретінде мемлекет тарапынан 150 гектар жер бөлініп отыр.
Жаңа терминал жүктерді көлік түрлері бойынша шоғырландырып, пойыздарға тиеуге арналған. Сондай-ақ, маршруттық-контейнерлік пойыздарды өңдеп, қойма және терминал операцияларын орындайды. Бастапқы кезеңде жылына 100 мың контейнерге дейін қабылдауға қуаттылығы жетеді. Жүк ағынының артуына қарай терминалдың мүмкіндіктерін жылына 450 мың контейнер қабылдауға дейін ұлғайтуы да ықтимал. Терминалдың заманауи хаб ретінде жұмыс істеуі Достық стансысы арқылы өтетін көлік маршрутының бәсекеге қабілеттілігін арттыруға ықпал етеді. Бұл Қытай – Еуропа бағытында қарқынды дамып келе жатқан контейнерлік жүк тасымалын одан әрі өрістету үшін өте маңызды. «ҚТЖ» ҰҚ» АҚ Қазақстан аумағы арқылы Еуропа – Азия бағытына да трансконтиненталдық транзиттік жүк ағынын тарту мақсатында Достық стансысын дамытуға үлкен көңіл бөліп отыр.
Бұл – бастапқы кезеңге жоспарланған жұмыстар ғана. Қалған екі кезеңде заман сұранысы мен сол уақыттағы жағдайларға байланысты бірнеше зауыттың, өзге де қоймалардың құрылысы басталуы мүмкін.
Алмат ЕСЕНБЕКОВ
