«ҚазАвтоЖол» ҰК АҚ Алматы облыстық филиалы мен «Қазақавтожол» ЖШС Алматы облыстық филиалының хабарлауынша, ағымдағы жылдың 17 қарашасында сағат 12:10-нан бастап ауа райының қолайсыздығына байланысты «Үшарал-Достық» республикалық маңызы бар автожолында (84-184 км-ге дейін) барлық автокөлік түрлері үшін қозғалыс жабылды.
Осыған байланысты Алматы облысының төтенше жағдайлар департаменті қысқы жолдардағы мынадай қауіпсіздік ережелерін сақтауды ұсынады:
— ауа райының өзгеруін, метеорологиялық мәліметтерді бақылау, ауа райының нашарлауы және автожолдарда автокөлік қозғалысына шектеулер енгізу кезінде шықпау;
— әрбір автокөлікте міндетті түрде шұғыл жағдайда қажет заттар — шамдар, арқандар, дөңгелектерге арналған шынжырлар, күректер, парафинді шырақтар, сондай-ақ, жылы киім, тамақ және су қоры болуы тиіс;
— қатты аяз немесе қар жауған кезде бірнеше автокөлік топтасып жүргені абзал, сонда сынған жағдайда колоннадан басқа жүргізушілер көмекке келе алады;
— жазғы шиналарды қысқы шиналарға уақытылы ауыстыру қажет;
— егер сіз боран немесе қатты аяз кезінде жолда қалсаңыз, егер сіздің көлігіңіз елді мекеннен алыс жерде немесе сізге таныс емес жерде бұзылса, көлікте жолда басқа көліктің жүруін күтіңіз немесе «101» және «112» нөмірі бойынша ұялы телефон арқылы көмек шақырыңыз.
Қыста жолға шыққанда мұқият жоспар құрыңыз және егжей-тегжейлі осы ережемен танысыңыз. Төтенше жағдайда әрбір ұсақ-түйек маңызды!
«ЖЕТІСУ-АҚПАРАТ»
