Сүйінбай атындағы орта мектебінде қылмыстың алдын алу мен құқықбұзушылықты болдырмау мақсатында «Құқықтық тәрбие айлығы» өтті. Жамбыл аудандық білім бөлімінің бас маманы А. Зейнелаева, аудандық полиция бөлімінің ювеналдық полиция тобының учаскелік аға инспекторы, полиция майоры А. Ғазизова, қатардағы полиция инспекторы А. Есімбекова, директордың тәрбие ісі жөніндегі орынбасары М. Монтаева бірлесе атқарған игі шаралар жоғары деңгейде ұйымдастырылды.
Қашықтан оқыту кезеңіндегі шаралар ZOOM, Wһatsаpp желілері арқылы жүргізілуде. Құқық айлығы аясында сынып жетекшілері А. Алиақбарова, Ж. Қадырқұлова 8-9-сынып оқушыларымен «Сыбайлас жемқорлықсыз қоғам», «Құқық әлемінде» атты сынып сағаттарын өткізді. Тарих пәнінің мұғалімі Р. Мамытбекова жоғары сыныптармен «Заң бәрімізге ортақ» құқықтық оқу шарасын ұйымдастырды. «Қыз болашағы – ұлт болашағы» тақырыбындағы мектепішілік қыздар жиналысында «Салтанат» қыздар ұйымының жетекшісі С. Айтбаева, мектеп медбикесі А. Байбөлекова, педагог-психолог Ж. Бижанова қыздарға әңгіме-кеңестерін айтты.
Жоғары сыныптың балаларымен «Ұлша тәрбиелесең – ұл болады, құлша тәрбиелесең – құл болады» деген даналықты басшылыққа ала отырып, АӘД пәнінің мұғалімі А. Әбішев, педагог-ұйымдастырушы А. Әбутәліп ұлдар жиынын өткізді. Кері байланыста ұлдар өз ойларын ашық айтты.
«Менің инспекторым» бағыты бойынша полиция инспекторы А. Есімбековамен кездесу өтіп, онда оқушылар мен ата-аналарға құқықтық сауаттылық бойынша кеңес берілді. «Айыппұл қандай жағдайда салынады? Мөлшері қандай? Жасөспірімдердің түнгі уақытта жүруіне тыйым салынған ба?» деген сауалдарға жауап алынып, оқушылар арасындағы бопсалау, отбасындағы кикілжің, т.б. мәселелер кеңінен қозғалды.
«Түнгі бала» рейді ауылымызда тұрақты түрде айына бір рет жүргізіліп тұрады. Мейрам күндерінде тәртіпсіздікке жол бермеу мәселесі де мектеп әкімшілігі тарапынан қадағаланады. Бұл іс-шаралардың құқықбұзушылықтың алдын алудағы маңызы зор.
Ләйлә БАЙБӨЛЕКОВА,
Сүйінбай атындағы орта мектеп директорының орынбасары
Жамбыл ауданы
