Қазақстан Республикасы Сыбайлас жемқорлыққа қарсы іс-қимыл агенттігі парасаттылық департаментінің директоры Ғанижан Асанұлы, агенттік жанындағы Республикалық ақпараттық-ағартушылық штабының төрағасы Ырза Тұрсынзада Алматы облысы бойынша мемлекеттік кірістер департаменті қызметкерлерімен кездесті.
Негізгі мақсат — кеңейтілген ақпараттық жұмыс арқылы сындарлы диалог құру және парасаттылық қағидаттарын дамыту. Штаб халықтың түрлі топтары үшін түрлі тәсілдерді қолдана отырып, кездесулер өткізуді көздейді.
Кездесуде агенттіктің парасаттылық департаментінің директоры Ғанижан Асанұлы сыбайлас жемқорлыққа қарсы мәдениетті және қоғамда берік иммунитетті қалыптастыру мақсатында іске асырып жатқан жобалар туралы айтып берді.
Өз кезегінде штаб төрағасы қысқа мерзімде елімізде құқықтық мемлекет құру және сыбайлас жемқорлық мәселелерін жою мүмкін еместігін атап өтті. Сапалы жаңа құқықтық санасы бар азаматтардың тұтас буынын тәрбиелеу қажет.
Алматы облысы бойынша мемлекеттік кірістер департаментінің басшысы С.Дынбаев қазір негізгі жұмыс мемлекеттік кіріс органдарындағы сыбайлас жемқорлық деңгейін төмендету үшін жасалып жатқанын, жаңа пәрменді әдістерді енгізу бойынша белсенді жұмыс жүргізілетінін, сыбайлас жемқорлық тәуекелдеріне ішкі талдау тұрақты өтетінін, қоғамдық және үкіметтік емес ұйымдарды тарту мүмкіндіктері кеңейтілгенін, ақпараттық ашықтық қамтамасыз етілгенін атап өтті. Сонымен қатар, ол республикалық ақпараттық-ағартушылық штабтың алдын алу шаралары сыбайлас жемқорлыққа қарсы күресте жаңа серпін беретінін атады.
— Біз сыбайлас жемқорлыққа қарсы жағдайды жақсарту бойынша барлық пәрменді шараларды қабылдап жатырмыз және сыбайлас жемқорлықтың алдын алу мәселесі тұрақты бақылауда екенін атап өткім келеді, — деді департамент басшысы.
«ЖЕТІСУ-АҚПАРАТ»
