Жыл сайын облыс әкімінің қолдауымен «Жылдың үздік мүғалімі» байқауы өтуде. Биыл аталмыш байқауда бағын сынаған Ақсу ауданы, Ғани Мұратбаев атындағы орта мектебінің математика-информатика пәнінің мұғалімі Асыл Қаймұханов топ жарып, өзінің үздік ұстаз екендігін дәлелдеді.
Педагогикалық салада сегізжылдық тәжірибесі бар ұстаз оқушылармен жұмыс істеуде өзінің бейнесабақтарын сәтті қолдануда. Әр сынып бойынша жазып қойған бейнесабақтардың толық жинағын да шығарып үлгерген.
– Бейнесабақтың тиімділігін айтып өтсем, ыңғайлы жерде, қолайлы уақытта бірнеше рет қайталап көруге болады. Бейнесабақтар жинағымды біздің мектеп қана емес, еліміз бойынша оқушылар көріп пайдалануда. Мысалы, қашықтан оқыту жағдайында бейнесабақтар жинағы жарияланған сайт 441,2 мың қаралым жинап, 6,2 мың жазылушы тіркелген. Кейбір ғаламтор жылдамдығы аз немесе интернеті жоқ елді мекендерге бейнесабақтарымды ақпарат тасымалдағыш құралдармен тараттым.
Қашықтан өтіп жатқан сабаққа оқушыларды белсенді қатысуға тарту үшін тиімді кері байланыстың орны ерекше екенін түсінудемін. Себебі, тиімді берілген кері байланыс – оқушының белсенділігін арттыруға әсер етеді, – дейді Асыл Қайырбекұлы.
Ұстаз әр баланың бойында болуы тиіс ХХІ ғасыр дағдыларын дамыту, қалыптастыруға айрықша мән береді. Оны баланың кітапқа деген қызығушылығын ояту арқылы жүзеге асыруда. Осы бағытта өткен оқу жылында «Кітап оқу марафоны» жобасын қолға алған болатын, штаттық режимде оқыту енгізілсе осы бастамасын жалғастыруды өзіне міндет санайды.
Асыл Қайырбекұлы қатысқан облыстық байқау төрт кезеңнен тұрды. Сырттай өткен екі кезеңде «Балапан» телеарнасында жүргізіліп жатқан телесабақтар нұсқасында жасалған бейнесабақтар және байқауға қатысушылардың кәсіби жетістігін айқындайтын электронды портфолиосы қаралды. Ал бетпе-бет өткен екі кезеңде қатысушылар жұмыс жүйесінің моделімен таныстырып, импровизациялық тапсырма орындады.
Ұстаздың ұсынған сабағы проблемалық және сын тұрғысынан ойлануына бағытталуымен, тапсырмалар мен тесттер функционалдық сауаттылыққа негізделуімен және сабақ соңында конструктивті кері байланыстың болуымен ерекшеленді. Әділқазылар алқасы тарапынан ұсынған оқыту тәсілінің құндылығы, жаңашылдығы, ерекшелігі, тәжірибеге енгізу және тарату, жұмыс моделін таныстыра алу қабілеті жоғары бағаланды.
Осындай айрықша педагогикалық ізденісімен көзге түскен ұстаздың алар биігі әлі алда деп білеміз.
Алма ЕСЕНБАЕВА
