Мектепті екінші үй десек, ұстазды анамыз дейміз. Ұстаз болу екінің бірінің қолынан келе бермейді. Алыптың да, дананың да ұстазы болған. Ыбырай Алтынсарин атамыз айтқандай: «Мен үшін жақсы мұғалім бәрінен де артық, өйткені мұғалім – мектептің жүрегі!».
Менің де сүйікті де алғашқы ұстазым Анаргүл Кәкімханқызы.
Алғаш мектепке барған кезім әлі есімде. Атам мен апам қолымнан жетектеп, ақ батасын беріп, Назарбаев зияткерлік мектебіне алып келді. Сол күні мен келешекте білім нәрімен сусындатар ұстазым Анаргүл Кәкімханқызымен таныстым. Ұстазым маған бірінші күннен ақ ұнады. Алғаш әліппемен таныстырып, жазуды үйретіп, білім бұлағынан сусындатқан Анаргүл апайдың еңбегі ұшан-теңіз. Содан бері апайымыздың арқасында біліміміз артып, өзімізге беймәлім дүниенің қыр-сырын молынан танып келеміз. Ол айналамызға саналы адамның көзімен қарауға үйретті. Бұл біздің ұстазымыздың еңбегі.
Үйдегі әке мен анашымның тәрбиесінен кейін мектеп қабырғасында жақсылыққа, әдепті, білімді болуға тәрбиелейтін екінші адам ол менің алғашқы ұстазым Анаргүл апай.
Анаргүл Кәкімханқызына алғысым шексіз. Мен ұстазымды өте жақсы қөремін. Ардақты апайым, сізді ұстаздар күні мерекесімен құттықтаймын! Сізге өмірдегі бар жақсылықты тілеймін. Инемен құдық қазғандай қиын да қажырлы ұстаздық еңбегіңіз табысты болсын!
Осы тілегімді барлық ұстаздар қауымына да арнаймын.
Гауһар Байжұман,
Назарбаев зияткерлік мектебінің 5 «а» сынып оқушысы
Талдықорған қаласы
