Биыл жаркенттіктердің төл дақылына айналған жүгерінің егіс көлемі жылдағыдан кеміген жоқ. Жалпы 25 мың гектардан астам алқапқа өсірілген «дала аруының» шығымы жақсы, егістік алқаптарын көк теңіздей көмкеріп, көрген көзді сүйсіндірген дақыл ел несібесіне негіз болатындай.
– Биыл егін суаратын судың тапшы екені рас, – дейді өңірдегі жүгері өсіретін «Ернар» атты ең ірі қожалықтың басшысы Тасқын Жапарқұл. – Алайда «Ұйымдастыра білген ұтады» демекші, «Қазсушаруашылығы» мемлекеттік мекемесінің Тоқтарбай Керімқұлов жетекшілік ететін Панфилов аудандық филиалы өндірістік учаскесі мұраптарының ұйымшылдықпен атқарған тынымсыз қарекетінің нәтижесінде егін суаратын судан тапшылық көрген жоқпыз. Жылда жүгерішілер шілде айының соңына дейін дақылдың алғашқы суын беріп әрең үлгерсе, биыл үш мәрте суаруға қол жеткіздік.
Қазіргі уақытта өңірде 20 мың гектардан астам жүгері алқабы үш рет суарылып, 500 гектардан астам алқап төртінші мәрте суарылуда. Егін суару жұмыстары Үшарал, Үлкеншыған, Бірлік, Басқұншы және Пенжім ауылдық округтерінде қарқынды жүргізілуде.
М. МАНАПҰЛЫ
Панфилов ауданы
