Райымбек ауданына қарасты Сарыжаз ауылында тұратын ұста Бақыт Манжуовты үйінің ауласындағы ұстаханасында таға соғып жатқанында кездестірдік. Көрігінде от лаулап тұр. Темірді қып-қызыл етіп қыздырып, таға соғып жатыр. Айналасындағы алғыр көмекшілері де әр іске бейім.
– Ұсталықты бүкіл аймаққа ісі мен есімі таныс Қожатай атты әкем үйретіп кетті. Үнемі қасында болатынмын. Сом балғамен қызған темірді төс үстінде ұратынмын. Әкем оны қажетінше таға, шегеге иліктіретін. Шеге қағылатын орнын тесетін. Сөйтіп, кезекті өнім дайын болып жататын. Осылайша, әкемнің игілікті шаруасын өзім жүргізетін дәрежеге жеттім, – дейді ұста Бақыт Манжуов.
Рас, Бақыттың ұсталық еңбегінің жемісін ауылдағы малшылар, шаруа қожалықтарының мүшелері, жекелеген ауыл тұрғындары көруде. Олар жаз маусымында жаздық таға жасатып алады. Өйткені, ат тағасыз көп іске жарамайды. Тау, тасты жерлерде, қырқа-қырқада алыс ұзап, жүре алмайды. Бақыт өзінің ұстаханасы арқылы ауыл тұрғындарының сұранысымен қалақ, қысқаш, балта, тағы да басқа темірден жасалатын үй заттарын жасай береді.
«Шәкіртсіз – ұстаз тұл» демекші, ұстаның Жалғас Манжуов, Рысбек Күнтубаев, Мейрамбек Бақдәулетұлы секілді белді көмекшілері әрі ұсталыққа баулып жүрген шәкірттері бар. Олардың шеберлігіне тәнті болып, ұстахананың игілігі өсе берсін деген жылы ниетпен аттандық.
Қанат БІРЖАНСАЛ
Райымбек ауданы
