Қашықтан оқыту – электрондық және телекоммуникациялық құрылғылар арқылы жеке тұлғаны дамыту және білім берудің жаңа жүйесі. Мұндай оқыту – мұғалім мен үйренушінің арасын жақындастыра түседі. Облысымыздағы іргелі оқу орны, 85 жылдық тарихы бар Талдықорған жоғары политехникалық колледжі бүгінгі таңда облыс бойынша техникалық және кәсіптік білім беруде заманауи көрнекіліктермен жабдықталған оқу орны.
Атақты педагог-ғалым В. Сухомлинский: «Мұғалімдік мамандық – бұл адамтану, адамның күрделі және қызықты, шым-шытырығы мол жан дүниеге үңіле білу, педагогикалық шеберлік пен педагогикалық өнер – ол даналық жүрекпен ұға білу болып табылады» деп айтқан. Сондықтан, қалай оқытса да ұстаздың ұстанымы – оқушыға дәріс беру. Шәкіртті білім нәрімен сусындату. Қашықтан оқыту – білімгер мен мұғалімнің өзара қарым-қатынасының өзгеше формасын ұсынды. Қолданыстағы барлық бағдарламаларды қамтитын әдіс-тәсіл мен тәжірибенің жиынтығы. Осы орайда Талдықорған жоғары политехникалық колледжінің педагогикалық ұжымы өздерінің кәсіби шеберліктері мен тәжірибелерін шыңдай отырып, оқытудың жаңа үлгісіне қадам басты.
Оқытушы мен білімгердің өзара қарым-қатынасының өзгеше формасын, өзгеше оқу құралы мен әдістемесін, оқытуды ұйымдастырудың өзгеше түрін ұсынып отыр. Сонымен қатар, оның құрамы кез келген оқыту формасында, кез келген оқыту жүйесінде бар компоненттерден; оқытудың барлық түрінде, әлеуметтік қажеттілікті өтейтін мақсаттардан; оқу орнының түріне қарай қолданыстағы бағдарламаларды қамтитын мазмұннан; әдістемелерден, ұйымдастыру формасынан, оқу құралдарынан тұрады.
Ұжымдағы әр ұстаз және топ жетекшілері өздерінің шәкірттеріне, ата-аналарына бағыт-бағдар, түсіндірме жұмыстарын жоғары деңгейде жүргізе отырып, оқыту мен білім беру үрдісін жалғастырды. Ұжымдағы ұстаздар қауымы жан-жақты ізденіп, видеосабақтар даярлап, берілген уақытты тиімді пайдалана білді. Бастапқыда бұл жұмыс қалай болады деген қобалжу барлық ұстаздың көкейінде тұрған. Қазіргі уақытта қашықтан оқыту жобасын колледж мұғалімдері толықтай меңгеріп, тәжірибе жинақтап, төселіп қалды. Бүгінгі таңда мұғалімдер, білімгерлер өзара білім алмасу үдерістерін үздіксіз жалғастырып келеді. Білімгерлер пән мұғалімдерімен кері байланыс орнатып, ізденістерін толықтыруда. «Алматы облысының білім басқармасы» облыстық білім беруді дамыту оқу-әдістемелік орталығы мен Талдықорған жоғары политехникалық колледжі бірлесіп, вебинарлық кездесу, ашық сабақтар өткізді. Кездесуде колледжіміздің директоры ф.м.ғ.к. Е. Мұқажанов Worldskills чемпионатына дайындау, қашықтан демонстрациялық емтиханды өткізу жолдарын кәсіптік тұрғыдан сүйемелдеудің жолдарын, тәжірибедегі мүмкіндіктерді көрсету жайлы түсіндіріп, айтып өтті. Осы ашық сұрақ алаңына колледждегі Worldskills орталығының жетекшісі, Г. Токенова, IT технологиясының эксперт бөлім меңгерушісі А. Тойшыбекова қатысып, өз тәжірибиелерімен бөлісті.
Жас мамандарға IT құзыреттілігін арттыру және әдістемелік көмек беру мақсатында әдістемелік сағат, семинар, вебинар, тәжірибелерді көрсетіп, бейнесабақтар өткізілді. Облыстық есеп өндірістік оқытуда – радиоэлектроника және ақпараттық технологиялар мамандықтары бойынша колледжіміздің жас мамандары Әлішер Жанаев, Назар Албосынов өздерінің тәжірибелерімен бөлісіп, республикалық семинарға қатысты. Колледжіміздің пән оқытушысы Қайнар Бақытұлы «құрылыс мамандығындағы кәсіби модульдерді қашықтан оқыту» әдісі туралы KNAUF жобасы арқылы республикалық вебинарда бөлісті.
Қазақстан Республикасы бойынша техникалық және кәсіптік білім беру ұйымдары арасында 2019 жылы жүргізілген рейтинг қорытындысына қарай колледжіміз «Ең үздік» ондықтың қатарына енді. Колледж қашықтан білім беру технологиясын облыста алғашқы болып 2010 жылы бастаған еді. Колледжде ақпараттық білім беру порталы, қашықтан оқыту порталы және оқу-әдістемелік жинақтардың 200-ден артық пәндері бойынша қазақ, орыс тілдеріндегі электронды нұсқасы жинақталған. Бұл – барлық пән бойынша кейстер құруға мүмкіндік тудырды. Бұл кейстерге арнайы сайт арқылы кіруге болады. Осы орайда колледж оқытушылары өздерінің кәсіби шеберлігін пайдалана отырып, қашықтан оқыту технологиясын шыңдап, үлкен жауапкершілікпен оқу үрдісін жалғастыруда. Сонымен қатар, басқа колледждермен тәжірибе алмасу, республикалық, облыстық деңгейдегі колледждің үздік мамандары тәжірибелерімен бөлісіп отырды. Платонус, зум платформалары сайттарында бейнесабақтар, электронды оқулықтар, қосымша материалдар жариялануда.
Қорыта айтқанда, қашықтан оқыту қазіргі заман талабы болса, оны ұйымдастыруда ең бастысы электрондық курстар, қашықтан оқытудың дидактикалық жасалымы, педагог-үйлестірушілерді даярлау негізгі мәселе болмақшы. Бұл үрдіс – біліктілігі жоғары, зияткерлік және кәсіби деңгейі дамыған, халықаралық дәрежедегі бәсекеге төзімді қоғам құруға зор көмегін тигізеді.
Қашықтан оқыту технологиясы – мамандарды даярлау мен олардың біліктілігін әрі қарай тереңдете арттыру бағытындағы осы заманның ең әсерлі де тиімді жүйесі болып табылады және болашақта алатын орны орасан екені даусыз.
Айжан МҰҚАНОВА,
Талдықорған жоғары политехникалық
колледжінің әдіскері
