1 наурыз – Қазақстан халқы Ассамблеясының 25 жылдығы және Алғыс айту күніне орай Бастөбе ауылында үлкен мәдени шара өтті.
Сонау нәубет жылы өз ұясынан жат жерге жер аударылып, солақай саясаттың тауқыметін көрген қаншама ұлт өкілі бар?! Сондай қиын-қыстауды басынан өткізген отыздан аса ұлттың өкілі осы Қаратал ауданына орын тепкен еді. Солардың арасында корей ұлтының өкілдері Бастөбе ауылына орналасып, күн кешті. Адамның айдауымен келген ұлтқа қазақ халқы қайырымдылық танытып, бауырына басты. Қазір дәл сол аймаққа өздерінің ескерткішін орнатып, жыл сайын осы мерекеде бас қосып, қазақ халқына алғысын айтып, киелі орынға тағзым жасау дәстүрге айналған. Міне, биыл да сол мәдени шараның куәсі болдық.
Қасиетті мерекенің бірі саналатын мейрамға Қаратал ауданының әкімі Қайрат Бұлдыбаев, Қазақстан халқы Ассамблеясы облыстағы төрағасының орынбасары, хатшылық меңгерушісі Ғабит Тұрсынбай қатысты. Ең бірінші ескерткішке гүл қойып, құрмет көрсетті. Одан кейін аудан әкімі Қайрат Бұлдыбаев сөз алып, бүгінгі мерекенің мән-жайына кеңінен тоқталды.
– Осы күн тағдыр тоғыстырған Қазақстанның көпэтносты халқының ортақ тарихын құрметтеу күні болады. Алғыс айту күні – қайырымдылық дәстүрлерін, әлеуметтік ынтымақты және өзара көмек көрсетуді қолдау күні. Бұл – репрессия мен жер аудару жылдарында біздің халық көрсеткен мейірімділік пен ақкөңілдік, қолда бармен бөлісу, көмек көрсету сынды рухани дәстүрлер күні, — деген аудан әкімі осы айтулы күнмен барлық жұртшылықты құттықтап, алғысын білдірді.
Өз кезегінде Ғабит Тұрсынбай да құттықтау сөзін арнап, облыс бойынша атқарылып жатқан игілікті іске тоқталып, бұл мерекенің маңызы зор екенін жеткізді. Сонымен қатар, отыздан аса түрлі ұлт өкілдеріне пана болып отырған Қаратал ауданының басшылығы мен тұрғындарына алғыс айтып, еңбектеріне табыс тіледі. Құттықтау сөзден кейін түрлі этномәдени орталық жетекшілеріне алғыс хаттар табыс етті.
Корей этномәдени орталығы ақсақалдар алқасының төрағасы Виктор Пак сөз сөйлеп, ұлтының атынан қазақ халқына мың Алғыс деп, бас иіп құрмет көрсетті.
Салтанатты шараның соңы мәдени кешке ұласты. Ескерткіш басында мектеп оқушылары Алғыс айту күніне әдеби кеш арнап, соңынан аудандық Мәдениет үйінде өнер иелерінің концертімен жалғасын тапты.
Ришад ТҰРҒАНБАЕВ
Қаратал ауданы
Алматы облысы
