Алматы сән және дизайн колледжінде «Өзін-өзі тану: сүйіспеншілік пен шығармашылық педагогикасы» атты онкүндік өтті. Шараға осы пән бағдарламасын ұсынып, оны жүзеге асырған үлкен жүректі ана – Сара Назарбаеваның шығармашылық педагогикасы өзек болды.
Онкүндікке I бағам студенттері айтарлықтай үлес қосты. Шараның ашылу салтанатын ұйымдастырып, «Балаға жүрек жылуы» атты көрмемен таныстырды. Келесі күні «Ізгіліктің ақтұмасы» атты байқаудың негізінде (қазақ, орыс, ағылшын, ұйғыр тілдерінде) эссе жазды. «Ән – көңілдің ажары» тақырыбында байқауға қатысты.
Колледждің «Еркін-пікір» дискуссиялық клубының жетекшісі, тарих пәнінің оқытушысы Айнагүл Қаскенованың жетекшілігімен дебат ұйымдастырылды. Әдебиет пәнінің оқытушылары К. Аукашова, А. Сымайлова. А. Қалдарбекова, Н. Алексеенколар «Алтын жүрек аналар» тақырыбында кеш өткізіп, 19-11 оқу тобының студенттері «Соғыстың соңғы көктемі» сахналық қойылымын қойды. Абай атындағы Қазақ мемлекеттік опера және балет театрына баруды да ұмыт қалдырмады.
Онкүндік барысында студенттер «Жер бетін жақсылық жайласын» флэш-мобын дайындады және «Мен бұл әлемді сүйемін» тақырыбындағы сурет көрмесіне туындыларын ұсынды. Алматы қалалық мүгедектерді бейімдеу және оңалту орталығына да барып қайтты. Өндірістік оқыту шебері А. Айтубар студенттерімен Ұлы Отан соғысының ардагері Әбдірахман Ешмұхамедовтың үйінде болып, өздері дайындаған тәтті тағамдарын табыстады. Ардагердің ғибратты әңгімесін тыңдап, батасын алды.
Колледж студенттері жалпыреспубликалық «Өмір негізі – сүйіспеншілік» тақырыбындағы ашық сабаққа қатысты. Сабақ қарсаңында колледжге келген Алмалы ауданының Ұлы Отан соғысы және еңбек ардагерлеріне сый-құрмет көрсетіліп, шаштараздық қызмет ұсынылды. Мерекелік дастарқан жайылып, шеберханаларға экскурсиялар ұйымдастырылды.
Сүйіспеншілік пен ізгілікке толы өткен онкүндік «Кішіге ізет, үлкенге құрметтің» рухани үрдісін жалғай түсті.
Әйгерім СЕРІКБЕКҚЫЗЫ,
Гульвира САДИРОВА,
Алматы сән және дизайн колледжінің «Өзін-өзі тану» пәнінің оқытушылары
