Облыс әкімі Амандық БАТАЛОВТЫҢ төрағалығымен актив жиыны өтіп, жаңа басшылар таныстырылды. Белгілі болғандай, облыстық полиция департаментінің басшысы болып полиция генерал-майоры Серік Күдебаев, Сыбайлас жемқорлыққа қарсы іс-қимыл агенттігінің облыс бойынша департаментінің басшысы болып Ернар Мақажанов тағайындалды.
Амандық Ғаббасұлы алдымен жаңа басшылардың еңбек жолдарына тоқталды. Облыс әкімі қызметін Жамбыл ауданынан бастаған Серік Күдебаевтың Жамбыл облысы мен Алматы қаласында абыройлы қызметтер атқарғанын, Алматы облыстық полиция департаментін бұған дейін де басқарған тәжірибелі де білікті маман екенін тілге тиек етті. Ернар Мақажановтың да өмірбаяны мен қызметтік баспалдақтарына қысқаша шолу жасап, алдағы жұмыстарына табыс пен сәттілік тіледі.
Сонымен бірге олардың ендігі білім-біліктіліктері мен күш-жігерлерінің елге адал қызмет етіп, ел Президенті Қасым-Жомарт Тоқаевтың тапсырмаларын орындау бағытында бірлесе жұмыс істеуге арналатындығына сенім білдірілді. Осылайша облыс әкімі тарапынан жауапты міндеттер жүктеліп, үлкен үміт артылды. Бұдан соң облыстық полиция департаментінің бұрынғы басшысы, полиция генерал-майоры Мұрат Ұрымхановтың аймақтың ішкі істер саласына сіңірген еңбектері айтылып, білікті де тәжірибелі басшы ретінде атқарған істеріне ризашылық танытылды.
Мұрат Жәлелұлының басқаруы кезінде аймақта тұрғын үймен біріктірілген учаскелік полиция пункттерін салу, «Көршілер бақылауы», «Нөлдік төзімділік» сияқты жобаларды жүзеге асыру, басқа да шаралар қолға алынды. Саланың материалдық-техникалық базасы да жақсарды.
Жиын барысында, сондай-ақ, Сыбайлас жемқорлыққа қарсы іс-қимыл агенттігінің облыс бойынша департаментінің бұрынғы басшысы Данияр Тұрғанбаевтың да сыбайлас жемқорлықтың алдын алу бағытында атқарған жұмыстары сөз болды.
– Бәріміздің басты міндетіміз – Елбасының, ел Президентінің тапсырмаларын орындау, халықтың игілігіне қызмет ету. Ортамыздан шығарып салып отырған азаматтарға ақ жол тілеймін! Ал жаңадан тағайындалған басшылармен бірлесіп, нәтижелі жұмыс істейміз деп сенемін. Еңбектеріңіз жемісті болсын! – деді Амандық Ғаббасұлы.
Өз кезегінде сөз сөйлеп, ойларымен бөліскен Данияр Мақанұлы мен Мұрат Жәлелұлы аймақ басшысына өздерінің ізгі ниеттерін жеткізе отырып, біраз жылдан бері қызметтес болып, қолдау көрсеткен әріптестеріне алғыстарын жеткізді. Облыс басшысы оларға естелік сыйлықтар табыс етті.
Айгүл БАЙБОСЫНОВА
