Елбасының «Рухани жаңғыру» бағдарламасы мен «Ұлы Даланың жеті қыры» атты мақаласы тамырлы тарихтың көмескі бедерін қайта қалпына келтіріп, асылымызды аршуға, қазынамыздың қамбасын бай етуге негіз болса игі. Аталмыш бағдарламалар жарық көрген уақыттан бастап ілкімді жоспарлар жасалып, келелі істер өріс алуда. Алайда кейбір қалыпты шараларды да осы бағытқа бұрып, бағдарламаны насихаттауға күш салудамыз деу – кемшілік.
Облыс орталығындағы «Рухани жаңғыру» орталығында өткен отырыста І. Жансүгіров атындағы Жетісу мемлекеттік университетінің ректоры Қуат Баймырзаев осылай деп мәлімдеді.
Өңірлік сараптамалық кеңестің кезекті отырысында «Рухани жаңғыру» бағдарламасы мен «Ұлы Даланың жеті қыры» мақаласының өткен жылы орындалу барысы туралы облыстық мәдениет, архивтер және құжаттама басқармасының басшысы Мәрлен Көлбаев есеп берді. Ол Жастар жылына орай 20 жас ақын-жазушының кітабы жарық көргенін, сол секілді көптеген жұмыстың атқарылғанын егжей-тегжейлі баяндай келе биыл әл-Фарабидің 1150, Жүсіп Баласағұнның 1000, Абайдың 175 жылдық мерейтойын тойлау жоспарда екенін жеткізді. Өз кезегінде «Жетісу» газетінің бас редакторы, Халықаралық «Алаш» әдеби сыйлығының лауреаты Әміре Әрін сөз алып, Фарабидің асыл нәсілі қазақ екенін дәлелдеп, қазақ руханияты үшін өлмес мұра қалдырған классик жазушы Әнуар Әлімжановтың 90 жылдық мерейтойын сол бабалар тойының санатына қосу керектігін атап өтті.
Келесі кезекте облыстық білім басқармасының бас маманы Руслан Арысланов өткен жылдың есебін баяндап, алға қойған мақсат-міндеттерді атап өтті. Орайы келгенде Назгүл Байғабатова, Айна Рахимова, Ғалиасқар Сарыбаев сынды сараптамалық кеңес мүшелері білім басқармасының тұлғаларды дәріптеу, олардың шығармашылығын насихаттап, Абай, Махамбет оқулары сынды рухани шараларды ұйымдастыруға онсыз да міндетті екенін, сондықтан ондай игі дүниелерді «Рухани жаңғыру» бағдарламасына таңбай, өзге тың дүниелерге ұйытқы болуына баса мән берсе екен деген ұсыныс білдірді.
Облыстық туризм басқармасының бас маманы Азат Мұхамедкәрімов, облыстық тілдерді дамыту жөніндегі басқарма басшысы Айдар Башбаев биыл атқарылуға тиісті жоспарларымен бөлісті. Өз кезегінде сараптамалық кеңес мүшелері тіл басқармасының өткен жылғы жұмыстары көпшілік көңілінен шыққанын жеткізіп, биыл да үлкен сеніммен бірлесе жұмыс жасайтындықтарын жеткізсе, туризм басқармасы кейбір жоспарды қайта қарап, пысықтай түссе деген ұсыныстарын білдірді.
Отырыс соңында сараптамалық кеңес мүшелері жылдық жоспарды тез арада бекіту керектігіне тоқталып, жылды абыроймен өткізуге күш салайық деген ақжарма тілекпен тарқасты.
АРДА БИ
