Жылдағы дәстүр бойынша энергетиктер мерекесі аталып өтті. Салтанатты шарада үздіктер марапатталып, сый-құрметке бөленді. Сондай-ақ, «ТАЭТК» АҚ-ның құрылғанына 50 жыл толды. Осы мерейтойға сәйкес кәсіпорында ұзақ жыл еңбек етіп, оның өсіп-өркендеуіне үлес қосқан бір топ ардагер мен жұмысшыларға марапат табысталды.
Мерекелік кеште энергетика саласының дамуына қосқан үлесі үшін ҚР Энергетика министрлігі, Қазақстан энергетиктер қауымдастығы, «Нұр Отан» партиясы облыстық филиалы, облыс және қала әкімдерінің марапаттары ұсынылып, соңы мерекелік кешке ұласты.
Шарада «Талдықорған акционерлік электржүйелерін тасымалдау компаниясы» акционерлік қоғамының басқарма төрағасы Серік Демидов көпшілікті құттықтады.
– Жетісу өңірін электр энергиясымен қамтамасыз етуде ұзақ жыл аянбай еңбек еткен ардагерлерге деген алғысымыз шексіз! Осы орайда, кәсіпорынды басқарған Сейілхан Шаукинов, Жеңіс Тұяқов, дағдарыс жылдары қиындықтардан алып шыққан Бақытқан Жазықбаев сынды азаматтарымыздың есімін ерекше атап өткен орынды. Жалпы біздің мекемеде 40 жылдан аса қызмет еткен ардагерлер, жас маман болып келіп, осы жерден зейнеткерлікке шыққан азаматтар да аз емес. Олар Анатолий Малютин, Молдақұл Ахметов, Нүсіп Машалов, Манат Суанбаев, Владимир Педан, Бейсенғали Оспанқұлов, Нұрсағи Сабитов, Талғат Сүлейменов, Анатолий Мацко, Мұхамеджан Бектенов, Елубай Төлеубеков сынды азаматтар. Сіздер – ардагерлер, компаниямыздың бастауында болып, үлгілі еңбектеріңізбен талай жас маманды тәрбиеледіңіздер! Бүгінде олар елдің ірі энергетикалық компанияларында қызмет етіп келеді, – деген Серік Семейханұлы аталған кәсіпорынның жеткен жетістіктерін әңгімеледі.
Елу жыл ішінде кәсіпорын әртүрлі кезеңді бастан өткеріп, облыстағы табысты кәсіпорындардың біріне айналды. 2019 жылға жөндеу-пайдалану жұмыстарына қарастырылған қаражат толық игеріліп, қайта құрылымдау жұмыстары мерзімінде орындалды. Нәтижесінде тұтынушыларды электрмен қамтамасыз ету сенімділігі артты. Қайта құрылымдау жұмыстары аясында Өтенай, Еркін ауылдарындағы желілер мен құрылғылар ауыстырылып, тұтынушылардың ризашылығына бөленді.
Сондай-ақ, Үштөбе, Текелі, Үйгентас, Ақсу аудандық электр желілерінің жұмысы алға басты. Аталған өңірлерде жөндеу-пайдалану жұмыстары мерзімінде аяқталып, электр желілеріндегі ысырап азайды. Осы сияқты басқа да жұмыстар атқарылды. Бүгінде компания Жетісу аймағын электр жарығымен сенімді әрі үздіксіз қамтамасыз етіп келеді. Бұл бағыттағы жұмыстар алдағы уақытта да жанданбақ.
Айгүл БАЙБОСЫНОВА
