Жуырда «Педагог мәртебесі туралы» Заң қабылданғаны белгілі. Осыған орай облыстық білім және ғылым қызметкерлері кәсіподақ ұйымы «Ұстаз мәртебесі – ұлт беделі» атты форум ұйымдастырды.
Көксу ауданының Балпық би ауылындағы Қ. Жалайыри атындағы орта мектеп-гимназиясында өткен шараға 200-ден астам ұстаз қатысты. Форум барысында облыстық кәсіподақ ұйымының төрағасы Садық Әбдіқадыров сөз алып, «Педагог мәртебесі туралы» Заңның 21 баптан, 4 бағыттан тұратынын айтып, ұстаздарымыздың құқығы заң аясында қорғалатынын жеткізді.
– Бір жылдан астам уақыт көпшілік талқылауына түскен заң жобасына мұғалімнен бастап, барлық білім беру саласының қызметкерлері ұсыныстарын білдірді. Заңда көпшіліктің талаптары ескерілді. Ұстаздар енді өзіне тән емес жұмыстардан босатылатын болды. Заң аясында кәсіподақ ұйымы жұмыс істеп, мұғалімдер құқығын қорғайтын болады, – деді қоғамдық бірлестіктің басшысы Садық Нұрсапаұлы.
Шарада Көксу аудандық білім бөлімінің басшысы Тілеумұрат Сейітниязов мұғалім құқығын қорғайтын заңның қабылдануымен аудан ұстаздарын құттықтады. Ал, Қ. Жалайыри атындағы орта мектеп-гимназиясының директоры Мұратбек Төлекенов өзі басшылық жасап отырған еңбек ұжымы аталған Заңды қуанышпен қабылдағанын жеткізді.
Қ. Жалайыри атындағы орта мектеп-гимназиясының қазақ тілі мен әдебиеті пәнінің мұғалімі Айгүл Иманбаева және аудандық кәсіподақ филиалының төрағасы Мирас Рахымжанов та аудан мұғалімдері атынан алғыстарын білдірді.
Алма ЕСЕНБАЕВА
