Көптің алғаусыз алғысын алып жүрген «Диана» шаштараз орталығына келуші көп. Ашылғанына аз уақыт өтсе де қызмет құнына сай еңбек етіп келеді. Шаштаразға сұлулықты серік етіп келген қыз-келіншектер сапалы жұмыстың саудасын қыздырғанына өкінген емес. Өйткені, мұнда сұлулық салонына сай қызметтің әр түрі ұсынылады.
Әдемілікті әспет көретін арулардың арманын орындауға Сәулет Шүйінбаева барын салуда. Тәжірибесі толысқан шебер шаш қиюдың жүйрігі. Ер, әйел демей алдына келген жанның тілегін қолдан келгенше қиюластыра біледі. Оған оның арнаулы білімі де жетеді.
Ә дегеннен ойда жүргенді іске асыру Сәулеттің арманы болатын. Бүгінде оған қол жеткізгеніне қуанады. Өзімен бірге бет әрлеуші Бибігүл Тілеужанова мен Фируза Балтабаева сынды көмекшілері жұмысын барынша жеңілдетіп жүр.
Айшықтылығымен көз тартқан бұл орын заманауи үлгіде бой көтерген. Іші мен сырты да заман талабына сай әрленген. Бөлменің кеңдігі мен әсемдігі және әртүрлі жабдық жарасымды орын тепкен.
– Өткен жылдың наурыз айынан бері жұмыс істей бастадық. Ауданға жаңа үлгідегі шаштараз керек екені көптен бергі ойым еді. Кәсіпкерлікке арналған сертификат арқылы грантқа қол жеткіздім. Бұл бастама сол арманның алғы қадамы. Ендігі кезекте бұл орынды қаладағыдай сервистік орталыққа айналдыру ойда бар, – дейді Сәулет Шүйінбаева.
Шынымен де шаштараз талапқа сай тартымдылыққа ие. Ауданға келген киногерлер де қызығып, «Елдің баласы» атты фильмнің бір-екі эпизодын «Дианада» дайындапты.
Аптаның барлық күнінде есігі ашық тұратын бұл орында алдын ала жазылып қою қызметі бар. Өйткені, ол алыс ауылдардан келетін адамдар үшін өте қолайлы.
Күніне шаштаразға кемінде жиырмаға жуық адам келіп шаш қидырады. Бағасы қалта қақпайды. Соғыс және еңбек ардагерлеріне, жағдайы төмен отбасыларына жеңілдік қарастырылған. Орталық алдағы уақытта қажетті қосымша жабдықтар және мамандармен толыға түспек.
Серікжан Мурасилов
Нарынқол ауылы,
Райымбек ауданы
