Көңілдің гүлі, көздің нұры болған балалардың сыңғырлаған күлкісіне толы ғимарат «Айкүн» балабақшасына аудан орталығында тұратындар ғана емес, тіпті, Талдықорған, Текелі қалаларынан да балаларын алып келетіндер бар.
Шынар Күмісбекқызы басшылық ететін «Айкүн» балабақшасы 2015 жылдан бері жұмыс істейді. Мектепке дейінгі білім, тәрбиенің бәрі осы жерде үйретіледі. Мекемеде жалпы саны білікті, білімді 27 қызметкер еңбек етеді. Олар балаларды төрт топқа бөліп (орта топ – «Балапан», «Күншуақ»; үлкен топ – «Балауса», «Бүлдіршін») тәрбиелейді. Мекеме заманауи техникалармен жабдықталған. Сондай-ақ, ғимаратта ойын залы, музыка бөлмесі, методикалық, өзін-өзі тану, психолог, медбикенің жеке-жеке кабинеті бар.
Балабақшадағы балапандарға тәрбие беріп, олардың болашақта бағытын дұрыс тауып, қоғамға қажетті адам болып қалыптасуына еңбек сіңіріп жатқан педагогтардың да жетістіктері көп. Мәселен, 2019 жылы республикалық «Үркер», «Пони» балалар байқауында үздіктер қатарынан көрінген Аруна Қабикенова, Ерасыл Жантасов, Айкүнім Бектасты дайындағаны үшін Жансая Қожахметова мен Мадина Дубекова арнайы алғыспен марапатталды. Бұл – жетістіктің бір ғана бөлігі. Болашақта да үлкен жетістіктерден көрініп, жақсы нәтиже көрсететіндіктеріне кәміл сенімдіміз.
