Тәуелсіздік күніне орай Жамбыл ауданында тіл орталығы ашылды. Салтанатты шараға аудан әкімі Бағдат Әлиев, облыстық тілдерді дамыту жөніндегі басқарма басшысы Айдар Башбаев қатысып, көпшілікті құттықтады.
«Алматы облысының «Тіл» оқу-әдістемелік орталығы» коммуналдық мемлекеттік мекемесінің аудандық филиалының ашылуында жиналған жұртшылыққа аудандық Қоғамдық кеңес төрағасы Жұмабек Шажабаев бата берді. Лента қию рәсімі жасалып, ақ жаулықты әжелер шашу шашқаннан кейін аудан әкімі бастаған мәртебелі меймандар оқу орнының ішін аралады.
Мұнда үш адам жұмыс істейді. Филиал меңгерушісі Ермек Жұматаев мамандармен, қажетті материалдық-техникалық жабдықталуымен таныстырды. Сынып бөлмесінде оқытушы Гүлмира Үскенбаеваның алғашқы тыңдаушыларға сабақ өткізу сәтіне куә болдық. Ол «Ю» дыбысының қазақ тілінде латын қарпімен таңбалануын түсіндіріп жатты. Оқытушы Нұр-Сұлтан қаласында оқыту курсында білімін жетілдіріп, тренерлік сертификат алыпты. Орталықтың басты мақсаты да осы – латыннегізді жаңа қазақ жазуына кезең-кезеңмен көшуді жүзеге асыру үшін әліпбидің емле ережелерін ересек тұрғындарға үйрету. Филиал әдіскері Ботакөз Байсариева мемлекеттік тілді меңгерем деушілердің де осы орталықтан дәріс алатынын айтты.
Аудандық Мәдениет үйі ғимаратының бір қапталына орналасқан мекеменің іші жайлы да жарық. Бөлмелер жұмысқа ыңғайлы. Ғимарат табиғи газға қосылғандықтан іші жылы.
С. ӘШІМБЕКҰЛЫ
Жамбыл ауданы
