Алматы қаласындағы Алматы облысының Мәдениет күндері тарихи музейден бастау алды. Мұнда Мұхаметжан Тынышпаев атындағы облыстық музейдің «Бақ мекен – Жетісу» атты көшпелі көрмесі қала жұртшылығына таныстырылды.
Бұл күні Жетісу жерінде дүниеге келіп, есімдері ел тарихында қалған белгілі тұлғалар Балпық бидің 325 жылдығына, қазақтан шыққан тұңғыш теміржол инженері, тарихшы-ғалым Мұхаметжан Тынышпаевтың 140 жылдығына және қазақтың жазба әдебиетінің негізін салушы, сөз зергері Ілияс Жансүгіровтің 125 жылдығына арналған көрме есігін айқара ашты.
Салтанатты шараның ашылу рәсімінде алғашқы болып сөз алған облыстық мәдениет, архивтер және құжаттама басқармасының басшысы Мәрлен Көлбаев жиналған жұртшылықты Мәдениет күндерінің басталуымен құттықтап, көшпелі көрмені тамашалауға келгендері үшін алғысын жеткізді.
— Екі күн бойы өтетін Мәдениет күндерінде сіздер жер жаннаты Жетісу деп аталатын қасиетті өлкенің мәдениетінен, өнерінен, әдебиетінен сусындай аласыздар. Себебі, бұл күндері театр әртістері мен филармонияның әнші-бишілері сахна төрінде өз өнерлерін көрсететін болса, жетісулық ақын-жазушылар кітапханада оқырманмен кездеседі. Өздеріңізге мәлім, биыл облыста Мұхаметжан Тынышпаевтың 140 жылдығы, Ілияс Жансүгіровтің 125 жылдығы және Балпық бидің 325 жылдығы кең көлемде атап өтті. Осы шараларға байланысты кітаптар шығарылып, қойылымдар әзірленіп, үлкен жұмыстар атқарылған болатын. Сіздер Мәдениет күндері аясында осы дүниелерді тамашалай аласыздар. Бұл, әсіресе, жас ұрпақты ұлтжандылық рухта тәрбиелеуге септігін тигізері сөзсіз.
Келесі сөз алған Алматы қалалық мәдениет басқармасы басшысының орынбасары Рузана Бектұрсынова ару шаһар мен облыстың өзара байланысын айта келіп, қонақтарға Мәдениет күндерінің жоғары деңгейде өтуіне тілектестігін білдірді. Ал қалалық музейлер желісінің директоры Сержан Сартов ел мен елді, халық пен халықты жақындастыратын мәдениет екенін айта келіп, Мұхаметжан Тынышпаев атындағы облыстық музейге Алматы қаласының келбеті бейнеленген суреттер альбомын табыс етті.
Осыдан кейін шараға келгендер көшпелі көрмеге қойылған жәдігерлермен танысуға мүмкіндік алды. Мұнда Ілияс Жансүгіровтің өзі киген көйлегі, пайдаланған жазу машинкасы, Фатима Ғабитова қолданған ыдыс-аяқтар, ақынның 125 жылдығына байланысты Ресейге барған экспедиция аясында табылған кітаптар, Мұхаметжан Тынышпаев туралы деректі құжаттар мен фотосуреттер, Балпық би киген дулыға көрермендердің ерекше қызығушылығын тудырды.
Мәдени шараның бірінші күні Бикен Римова атындағы облыстық драма театры ұсынған Мұхтар Әуезовтің «Айман-Шолпан» қойылымымен қорытындыланды.
Қуат ҚАЙРАНБАЕВ
Алматы қаласы
