Талдықорған қаласындағы №28 ІТ мектеп-лицейінің директоры Гүлжанар Еспанованың бастамасымен бастауыш сыныптарда «Табысты үштік» жобасы ұйымдастырылып келеді.
Биыл аталмыш жоба 5-9-сыныптар арасында да өткізілуде. Алғашқылардың бірі болып 8 «Б» сыныбы табысты жобаны бастап кетті. Осы сыныпта оқитын Ажар Андастың әкесі, «Жетісу» газетінің тілшісі Қажет Андас лицейдің ІТ сыныбында ата-ана, мұғалім, оқушылардың қатысумен алғашқы сынып сағатын өткізді. «Мәлім де, беймәлім өмір» атты сынып сағаты сан қырлы дарын иесі, жерлесіміз Ілияс Жансүгіровтің 125 жылдық мерейтойына орай тұлғаның жұрт біле бермейтін, жастарға, ата-аналарға және мектеп ұстаздарының есінде жүрер өмір тарихы мен шығармашылығы туралы болды.
Алдымен ол Жетісу жерінің мақтанышына айналған Қадырғали Жалайыр, Қабылиса жырау, Ескелді және Балпық би, Қабанбай, Ақын Сарадан бастап, Дінмұхамед Қонаев, Мұқан Төлебаев, тағы да басқа тұлғаларды түгендеп шықты. Оқушылардың көкейіне сәуле құйылып, көкжиегі кеңіді. Осыдан кейін Қажет Андас сөзінің соңын Ілияс Жансүгіровтің өмір жолы мен шығармашылық даралығымен сабақтады. Әсіресе, 4 жасында шешесінен айырылып, 13 жасында бірінші рет Хасан молдадан хат таныған Ілиястың ғұмыр жолы бүгінде 13 жасқа келген 8-сынып оқушыларына үлкен ой салды. Сонымен қатар, жалғыз ғана «Әптиекті» бітіріп, 8-ақ ай оқуға мүмкіндік алған Ілиястың осыдан ары ауыл молдасы атанып, бала оқыта бастағаны да балаларға шабыт бергені анық.
Сынып сағаты барысында балалар «Бүркеншік есім» дегеннің не екенін түсінді. Ал Ілиястың 42 бүркеншік есіммен жазғанын естігенде оның себебін сұрап сұрақты қарша боратты. Сондай-ақ, сынып сағатында Ілияс Жансүгіровтің осы күнге дейін ешбір жерде жарық көрмеген, елге жетпеген шетел архивтері мен жеке мұрағаттарда сақтаулы мұралары, Абай Құнанбаевтың қолжазбасы, «Ажар», «Мақпал» поэмаларының тұпнұсқасы көпшілікке таныстырылды. Сабақта Қ.Андас Ілиястың төтеше, кирилше, латынша шыққан кітаптары мен ондағы айтылған ойларын, жазылған дүниелерін де сараптап берді. Әдебиет оқулықтарында оқытылмайтын жаңа деректер мен ойлар оқушылардың Ілияс өмірі мен шығармашылығына деген ықыласын оятты. Сынып сағатының түпкі мақсаты да осы еді.
Шара соңында Қажет Андас қарындасы Мақпал Андаспен бірлесе отырып, бес жылдық уақытын жұмсап жазып шыққан, ел қолына тие қоймаған «Қазақ баспасөзінің жампозы» атты кітабын мектеп кітапханасына, ата-аналарға, белсенділік танытқан оқушыларға сыйға тартты.
Шараны 8 «Б» сыныбының жетекшісі Оңалсын Раева:
– «Табысты үштік» жобасының берері мол. Бұл жалпы үш жылдық жоба. Былтыр да нәтижелі аяқталды. Биыл да сәттіліктерге толы болатыны анық. Өткенде Тамыз кеңесінде лицей директорының орынбасары Гүлжамал Алмашева осы жоба жайлы таныстырып, үш жылдан соң тәжірибелерді облыс мектептеріне тарататынымызды айтқан болатын. Соған өз үлесімізді қосып, алғашқы сынып сағатын өткіздік. Сыныбымызда әр салада істейтін ата-аналар бар. Алдағы уақытта да олар өз мамандықтары бойынша сынып сағатын өткізіп, оқушыларға жақсы білім береді деп сенеміз, – деп қорытындылады.
Шара аясында 8 «Б» сынып оқушылары Айназдың апасы Мейрамхан Қуатбекова, Еркебұланның анасы Жадыра Рахымбекова, Арланның әкесі Мақсат Есенқұлов ой бөлісіп, алдағы шараларға белсене атсалысатындықтарын білдірді.
ӨЗ ТІЛШІМІЗ
