Талдықорған қаласында өтіп жатқан ауыр атлетикадан 5-жазғы спартакиада ойындары нағыз қызған шағына жетті. Еліміздің барлық атлеттері алтын үшін барын салуда. Әйтсе де жетісулық зілтеміршілер дес берер емес.
Сынға түскен жерлестеріміздің осалы жоқ. Барлығынан да алтын күтуге болатын спортшылар. Дәл солай да болды. Алғашқы күні төрт алтынға қол жеткізсек, екінші күні үш алтынмен еселей түстік. Сонымен жарысқа кезек берейік.
Ерлер арасында 67 келіде бақ сынаған Анатолий Савельев ешкімге дес бермеді. Бұған дейін де байрақты бәсекеде атой салып жүрген жетісулық оғлан бұл жолы да жеңісті жұлып алды. Ол қос сайыстың қорытындысы бойынша 296 келіні көтеріп, чемпион атанды. Екінші орынға ақтөбелік Харки Фархад орналасты. Оның еншісінде 295 келі. Үздік үштікті жерлесіміз Сайрамкез Ақмолда құрады. Жас болса да болашағынан көп үміт күттіретін спортшы ересектермен бірдей тайталасқа түсті. 269 келіні көтеріп чемпионаттың қоласын уысына түсірді.
55 келі қыздар арасында Айгерім Ауелбекті ешкім тоқтата алмады. Қаршадай қыз 168 келіні көтеріп, Алматы облысына тағы бір алтынды сыйлады. Ақмолалық Диана Жүсіпбекова (165 кг) күміспен күптелсе, шығысқазақстандық Диана Абдуллаева 157 келімен қоланы қанағат тұтты.
59 келі салмақта сынға түскендердің ішінен Зүлфия Чиншанлоның бағы жанды. Дүбірі асқан додалардың алтынын алып қалған жетісулық ауыр атлетші ел чемпионатының да алтынын ешкімге ұстатпады. Ол 210 келіні бағындырса, шығыстық Елизавета Белоусова 180 келімен күміске қол созды. Қола тұғырдан тағы бір жетісулық спортшы қол бұлғады. Гүлнұр Ыбырай 165 келіні еңсеріп, қоланы еншіледі.
73 келі салмақта Сайхан Тайсуевтің жолына үмітпен қарағанбыз. Өкінішке қарай, зілтеміршіміз жүлдегерлер санатына іліге алмады. Бұл салмақтың алтыны Қостанай облысының спортшысы Ренат Баударбековтың (302 кг.) мойнында кетті. 301 келімен ақмолалық Евгений Сорочинский күмісті алса, шығыстық Владимир Васильев (288 кг.) қоланы қоржынға тоғытты. 64 келі қыздар арасында алтын тұғырға шығыстық Дарья Павлова (203 кг.) көтерілді. Күмісті жерлесіміз Махаббат Серікболқызы (190 кг.) еншілесе, ақмолалық Александра Яковлева (173 кг.) қоланы иеленді.
71 келіде өнер көрсеткен жетісулық Анжела Чалкрова (205 кг.) алтынды ешкімге бермеді. Ақмолалық Екатерина Столяренко (201 кг.) қанша тырысса да алтынның ауылынан көріне алмай, күмісті қанағат тұтты. Шығыстық Екатерина Быкова (201 кг.) қоланы қанжығаға байлады.
76 келінің алтыны Алматы облысына тиесілі болды. Алматы қаласының спортшысымен нағыз айқасқа түскен Ольга Пастухова 214 келіні көтеріп, чемпион атанды. Алматылық Арай Нұрлыбекова 213 келімен күміске қол жеткізсе, қола тұғырға қызылордалық Динара Қыпшақбай (181 кг.) жайғасты.
Осылайша 5-жазғы спартакиада ойындарының үшінші күні Алматы облысының зілтеміршілері 9 алтынды жеңіп алды.
Ришад ТҰРҒАНБАЙ
