Талғар ауданына ресми іссапармен келген Алматы облысы әкімінің орынбасары Бағдат Манзоров бірқатар агроөндірістік кешенді аралады. Сондай-ақ, аудан жетістіктерімен және алдағы іс-шаралармен танысып, сапар соңында актив жиынына қатысты.
Бүгінде ауданның агроөндірістік кешенінде 2263 ауылшаруашылық құрылымы жұмыс істеуде. Оның 2161-і шаруа қожалығы, онда 11 мыңнан астам адам еңбекпен қамтылған.
Ауылшаруашылығында 9 млрд. теңгенің өнімі өндіріліп, нақты көлем индексі 102,2 пайызды құраған. Сонымен қатар, өнеркәсіп саласының өнім көлемі де 19,0 млрд. теңгеге жетіп, нақты көлем индексі 100,1 пайызды құраған.
Өнеркәсібі өркендеген іргелі ауданға ат басын бұрған Бағдат Сайланбайұлы «Баймене» жауапкершілігі шектеулі серіктестігінің жұмыс ырғағымен танысты. Аталған шаруашылық 2016 жылдан бастап тамшылата суару жүйесін пайдалана отырып, қарқынды бақ өсірумен айналысып келеді. Серіктістіктің жалпы ауылшаруашылығы мақсатындағы жер көлемі 85 гектарды құрайды. Оның 40 гектарына екі жыл бұрын қарқынды бақ өсіру жобасын іске қосқандығы туралы «Баймене» жауапкершілігі шектеулі серіктестігінің директоры Максим Коваленко әңгімеледі.
– Осы уақыттағы озық технологияны пайдалана отырып, алма өсірудің тиімділігі орасан зор екендігіне көзіміз жетті. Тамшылатып суару жүйесінің жабдықтарын Израильден әкеліп орнаттық. Бүгінде алақанға сыймайтын алманың «Джанатон», «Голден Делишес», «Гала», «Фуджи» сынды жаңа сорттарын Голландия мен Италиядан әкеп, өсірудеміз. Тез жерсінген алманың бұл сорттары 3,5х0,8 схемасымен отырғызылды. Жобаның жалпы құны – 520,0 млн. теңгені құрайды, – деген серіктестік басшысы осы жылы жалпы құны 1240,0 млрд. теңгені құрайтын 5000 тонналық жеміс сақтайтын қойманы іске қосу жоспарланғандығын және осы бағытта жұмыстар жүргізіліп жатқандығын мәлімдеді.
Іссапар барысында облыс әкімінің орынбасары Талғар қаласындағы «Keruen Plus» ЖШС жұмыс барысымен танысты. 2015 жылдан бері ПВХ профилі мен құбырлар, фитингтер өндірумен айналысып келе жатқан аталған кәсіпорында 140 адам еңбек етуде. Осы аталған өнімдерді бәсекеге қабілетті қазақстандық брендке айналдырып, ТМД аумағына шығаруды көздеген кәсіпорынның жұмысы жылдан-жылға ілгерілеу үстінде.
– Ауданда шағын және орта кәсіпкерлік субъектілері жұмыс істеп, нәтижесінде 26900 адам жұмыспен қамтамасыз етілген. Өндірілген өнім көлемі 72,0 млрд. теңгені құрайды. Аудан бюджетіне кәсіпкерлік саладан 6,8 млрд. теңге түсім жиналды. Аудан экономикасын дамытуға 24,2 млрд. теңге инвестиция тартылып, нақты индекс көлемі 133,5 пайызды құрады, – деді активте сөз бастаған аудан әкімі Рыскелді Сәтбаев.
– Осы уақытта 81,3 мың шаршы метр тұрғын үй салынып, пайдалануға берілді. Облыс әкімінің бастамасымен Талғар қаласындағы «Мелиоратор», «Бозторғай» шағын аудандарында 6 блоктық-модульдік қазандықтардың құрылысы жүргізілді. Бұл орталық жылу жүйесіне 23 көппәтерлі тұрғын үй қосылды, – деген аудан басшысы тұрғын үйлерді орталықтандырылған жылыту жүйесіне қосу жұмыстары жалғасатындығын баяндады. Сонымен қатар, 1046,5 шақырымды құрайтын аудандық маңызы бар автокөлік жолдарының жасалу жағдайына, ауызсумен қамтамасыз ету, аудандық білім және денсаулық сақтау саласындағы маңызды мәселелерге де назар аударды.
Актив жиынында Бағдат Сайланбайұлы мемлекеттік мекемелер мен бөлім басшыларына атқарылып жатқан жұмыстар жөнінде жеке-жеке сұрақ қойды. Өз кезегінде аудандық аурухананың бас дәрігері Н.Құлсейітов, білім бөлімінің басшысы Қ.Айсабекқызы, ауылшаруашылық бөлімінің басшысы Е.Толқынов, кәсіпкерлік бөлімінің басшысы Е. Алдатаев, тағы басқалары негізгі мәселелері мен ұсыныс-тілектерін ортаға салды.
Жиынды қорытындылаған облыс әкімінің орынбасары Б.Манзоров ҚР Президенті Қ.Тоқаевтың Қазақстан халқының тұрмыс-жағдайын жақсарту мақсатындағы нақты 10 бағытты жүзеге асыру шараларын тарқатты. Сондай-ақ, осы мақсатта талғарлықтардың жұдырықтай жұмыла атсалысатындығына сенім білдірді.
Ұлбосын ИСАБЕК
Талғар ауданы
