«Жастар» спорт сарайында 2004-2005, 2006-2007, 2008-2011 жылғы жасөспірім ұлдар мен қыздар арасында джиу- джитсудың комбат түрінен БЖСМ-нің ашық турнирі өтті. Сайысқа Текелі қаласы мен қаламыздың спорт мектептерінен 6 команда, 150-ге жуық спортшы қатысты.
Шарада сөз алған қалалық балалар мен жасөспірімдер спорт мектебінің директоры Қапалбай Әділбеков:
– Жастар арасында салауатты өмір салтын насихаттау, джиу-джитсу спортын дамыту мақсатында және Жастар жылына орай бүгінгі доданы ұйымдастырдық. Джиу-джитсу спорты өңірімізде қарыштап дамып, Қазақстанның Көк байрағын әлемге желбіретіп жүрген спортшыларымыздың қатары күннен-күнге артып келеді. Сондықтан бүгінгі дода біз үшін айрықша. Өйткені, Көк Туымызды желбіретіп, абыройымызды асқақтататын спортшылар осындай қалалық жарыстарда анықталады. Бүлдіршіндеріміздің арасынан ертең әлемдік ареналарда ел намысын қорғайтын спортшылар шығарына сенімім мол, – дей келе еліміздің болашағы өскелең ұрпақ екенін айтып, спортшыларға сәттілік тіледі.
Осыдан кейін жарыс басталды. Балуандар әр салмақ бойынша өзара мықтыны анықтады. Жоғары дайындықпен келген жасөспірімдер татами төрінде үздік өнерімен танылып, жұртшылықтың көңілінен шыға білді. Әсіресе, алғаш жарыс жолына шыққан спортшылардың бозкілемдегі шабысы көңіл толтырады. Шашасына шаң жұқпай ақтық сынға өткендердің кездесулері тіптен ерек. Дода десе ішкен асын жерге қоятын көрермендер де балдырғандарға жігер беріп, қызу қолдап отырды. Жауырынын жерге тигізгісі келмеген жас балуандардың сайысы тартысты болды. Нәтижесінде білек күші мен әбжіл әдіс арқылы қарсыластарын қоғадай жапырған жеңімпаздар Мақтау қағазы, медальдармен марапатталды.
Жарыс қорытындысы бойынша Талдықорған қаласының БЖСМ-нің спортшылары 4 алтын, 3 күміс, 3 қола медальді жеңіп алды.
Айдар ҚАЛИЕВ
