Ұйғыр ауданында облыстық мәслихаттың кезекті ХХХХVІ сессиясы өтіп, облыстық мәслихат пен тұрақты комиссияларының 2018 жылы атқарған жұмыстары және 2019 жылға арналған міндеттері қаралды.
Сессияда облыстық мәслихаттың хатшысы Сұлтан Дүйсембінов баяндама жасап, есепті кезеңде өткізілген жиындар мен шаралардың нәтижесін таныстырды. Оның айтуынша, былтыр облыстық мәслихаттың кезекті 5 және кезектен тыс 7-сессиясы өткізілген. 68 жалпы, 18 нормативтік-құқықтық сипаттағы шешімдер қабылданған сессиялардан бөлек облыстық мәслихаттың жанынан құрылған тұрақты комиссиялар жұмысын жоспарлы әрі жүйелі жүргізген. Сессияда алғашқы мәселе бойынша облыстық мәслихаттың депутаттары Ызғарбек Бектұрсынов, Жамал Құлахметова, Өтеғали Юнусов сөз алып, былтыр жемісті жұмыс жүргізгенін алға тартып, қанағаттанарлық деген баға берді.
Сондай-ақ, сессияда Қазақстан Республикасының «Сыбайлас жемқорлыққа қарсы іс-қимыл туралы» Заңының облыста жүзеге асырылуы туралы мәселе қаралып, «Нұр Отан» партиясы облыстық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңесі әзірлеген хабарлама тыңдалды. Сессияға арнайы қатысқан «Нұр Отан» партиясы облыстық филиалы төрағасының бірінші орынбасары Ғалиасқар Сарыбаев соңғы апталарда елімізде орын алған тарихи оқиғаларға тоқталып, Астана қаласына Тұңғыш Президентіміз, Ұлт Көшбасшысы Нұрсұлтан Назарбаевтың есімін берудің орынды дүние екенін алға тартты. Жиында қаралған мәселелер бойынша тиісті шешімдер қабылданды. Ұйғыр ауданының әкімі Шухрат Нурахунов сөз алып, облыстық мәслихаттың көшпелі сессиясының аудан төрінде өткізілгеніне ризашылығын білдірді. Ауданның өткен жылғы экономикалық және әлеуметтік даму қорытындыларына қысқаша тоқтала келіп, облыстан ат арылтып арнайы келген қонақтарға аудан тұрғындары атынан алғыс білдірді.
Қанат Біржансал
Ұйғыр ауданы
