Облыстық және Алматы қалалық кәсіпкерлер палатасының ұйытқы болуымен баспасөз туры ұйымдастырылды. Мұндағы мақсат – «Қорғас» шекара маңы ынтымақтастығы халықаралық орталығының қазақстандық бөлігінде орналасқан «Qaz Luimiere» деп аталатын жаңа сауда орталығының жұмысымен таныстыру.
Екі қабатты сауда кешені заман талабына сай еуропалық үлгіде бой көтерген. Жалпы алаңы 6500 шаршы метр. Ұйымдастырушылардың айтуынша, сауда орталығы іскерлік кездесулерге, Қазақстан мен ТМД елдерінде шығарылатын өнімдермен таныстыруға, сауда-саттық және бос уақытты өткізуге арналған тиімді іс-шаралар алаңына айналмақ.
Іс-шара жақын және алыс шетелдердің іскер топтары мен туристерінің қызығушылығын тудырады деп болжанып отыр. Мұндай мүмкіндік қазақстандық кәсіпкерлердің Аспанасты елінің нарығына шығуына жол ашып, халықаралық сауданы дамытуға ықпал етпек. Келушілерге де сапалы қызмет көрсетуге ден қойылған. Сауда үйінде қырықтан аса бутик бар. Онда Еуропа және ТМД елдері мен Қазақстаннан шыққан сұранысқа ие тауар түрлері саудаланатын болады.
Кәсіпкерлерге орын жалға беріледі. Негізінен Қазақстанда өндірілген өнімдерді саудалау басты мақсат болып отыр. Орталықтың арнайы экономикалық аймақта орналасуы қазақстандық бизнеске арнайы салықтық режимге сәйкес салық төлемдерін жасамай кәсіпкерлік қызметті жүргізуге мүмкіндік береді. Тауар қоймалары да сол маңнан табылады. Алдағы жазда адамдардың алаңсыз тынығуына арналған демалыс бөлмесі, жаттығу залы, бір сөзбен айтқанда, барлық жағдайы қарастырылған қонақүй салынып, жыл соңына дейін пайдалануға беріледі деп жоспарлануда. Ғимаратқа баратын кірме жолдар да сапалы салынған. Шетелдік туристерді тасымалдайтын жеке автобустар да бар.
Айта кетейік, сауда үйінің салтанатты ашылуы 1 мамырда өтеді. Десе де қазірдің өзінде орынды жалға алып, сауда жасап жатқандар бар. Онда украиналық өнімдер мен Грузияның арақ-шараптары, Қытайдың опа-далаптары, иіссулары секілді косметикалық бұйымдар саудалануда. Жалға алудың айрықша шарттары 1-15 мамыр аралығында Қазақстан – Қытай жәрмеңкесі күндері жүзеге аспақ. Осы кезеңде кәсіпкерлер көрме стендін (150 000 теңге) алу үшін ғана шығынданатын болады.
– Бұл көрме кәсіпкерлердің «Қорғас» ШЫХО мүмкіндіктерін көруі үшін өткізіліп жатыр. Осы арқылы кәсіпкерлер нарықты талдауға мүмкіндік алады. Бұдан әрі біз көрмені жарнамалау мақсатында Қытай тарапынан жарнама агенттігін жұмылдырамыз. Көрменің өзінде бірқатар іс-шара жоспарланған. Бұл Қытай нарығына шығудың бірегей жолы. Өндірушілер «Қорғас» ШЫХО-ға тауарларын жеткізіп, көрме стендін сатып алудан басқа шығындалмайды. Жалға алушыларға келетін болсақ, әрқайсысын жеке қараудамыз. Жалға алынып жатқан орынжайдың көлеміне қарай жеңілдіктер, жеңілдік кезеңдері қарастырылған. Барлық өндірушілермен, ұйымдармен іскерлік қарым-қатынасқа дайынбыз, – дейді аталмыш сауда орталығының атқарушы директоры Нариман Закирьянов.
Көрмеге Қазақстан, ТМД елдері мен жақын шетел тауар өндірушілері шақырылады. Алкоголь, шылым, киім-кешек, аяқкиім, кәмпит, шоколад, құрғақ сүт, ұн өнімдері, жиһаз, ыдыстар көрме экспонаты бола алады. Жаңа ауланған балық, жұмыртқа, шұжық өнімдері, уылдырық, жеміс-жидек пен сүт өнімдері, алтын, өсімдік тұқымдарына тыйым салынған. Ұйымдастырушылар экспонаттарды іріктеу құқығына ие. Көрмеге қатысу өтінімдері 1 наурыз бен 10 сәуір аралығында мына электронды пошта арқылы қабылданады: a.tastanbekova@atameken.kz.
«Хуан–Шыңғыс» жауапкершілігі шектеулі серіктестігі басшысының орынбасары Ұлан Темірланұлының сөзінше, сауда үйінің құрылыс жұмыстары былтыр жазда аяқталған. Бүгінде украиналық және белоруссиялық кәсіпкерлермен келісімшартқа қол қойылған. Еуропалық кәсіпкерлер де қатысады деп күтіліп отыр. Қытай туристері, әсіресе, экологиялық жағынан таза тағамдарға қызығушылық танытып отырған көрінеді. Сол талап үдесінен шығу үшін күш жұмылдырылуда.
Алдағы уақытта өтетін жәрмеңкеге 200-ден аса өндірістік компания шақырылыпты. Туристерді тасымалдауға арналған автобустар да қарастырылған. Бүгінде бұл кешенде жиырмадан аса адам жұмыспен қамтылса, олардың саны алдағы уақытта өсетін болады.
Айгүл БАЙБОСЫНОВА
