Екі апта бойы алыс-жақын елді мекендерді аралап, 24 селолық округ орталықтарында халықпен жүздескен аудан әкімі Бағдат ӘЛИЕВ бейсенбі күні қорытынды есебін берді. Аудандық Мәдениет үйінде өткен кездесуге мекеме, ұйым, құқық қорғау органдарының басшылары, ауыл әкімдері, аудан орталығы мен ауылдардан тұрғындар келді. Жиынға облыс әкімінің орынбасары Айдарбек БАЙЖАНОВ қатысып, жамбылдықтарды өңір дамуынан хабардар етті.
Ауданда жүзеге асырылған ауқымды жұмыстар алдымен бейнефильмде көрсетілді. Одан кейін Бағдат Байшалұлы көпшілік алдында 2018 жылы атқарылған істерді жан-жақты баяндап, алдағы межелерді айқындады. Ақындар мен батырлар мекенінің өткен жылды толайым табыстармен қорытындылағанын нақты мәліметтермен айғақтаған аудан жетекшісі әр саладағы істің жай-жапсарына жеке-жеке тоқталды.
Кейінгі кезде мұнда жан жадыратар жаңалық көп. Заман талабына сай көптеген тың істердің қолға алынып жатқаны жұртшылықты қуантады. Ауданның өткен жылға арналған әлеуметтік-экономикалық даму жоспары толықтай орындалды. Ауылшаруашылығында 47 млрд. 776 млн. 600 мың теңгенің өнімі өндіріліп, нақты көлем индексі 103,3 пайызды құрады.
Аудан облыс бойынша қой мен ешкі, жылқы өсіруден 1- орын, түйе, ірі қара санынан 2-орын, құс саны бойынша 5- орын алады. Мұнда 1 қаңтардағы мәлімет бойынша 89081 бас ірі қара, 607965 бас қой-ешкі, 30840 бас жылқы, 1422 түйе, 490421 бас құс есепте бар. Алдыңғы жылмен салыстырғанда былтыр ірі қара саны 2,5, қой-ешкі 3,9 пайызға, жылқы 7,5, құс 4,7 пайызға өсіп, түйе ғана 12,4 пайызға кеміпті. 23196 тонна ет, 47302 тонна сүт, 101 млн. 239 мың дана жұмыртқа өндірілген. Егістік көлемі алдыңғы жылға қарағанда 3266 гектарға артты. 48193 гектар дәнді дақыл егістігінен 109495 тонна арпа-бидай, 633 тонна сұлы, 27448 тонна жүгері, 5072 тонна майлы дақылдар, 1002 тонна жеміс-жидек, 31220 тонна картоп, 29443 тонна көкөніс, 11752 тонна бақша өнімі жиналды. Ауданда 8 жылыжай, 16 мал бордақылау алаңы, 7 тауарлы-сүт фермасы, ірі құс фабрикасы жұмыс істейді. Осы көктемде өндірістік қуаттылығы 8 мың тонналық ет комбинаты іске қосылмақ.
Жыл санап жылдам өсіп, халқының саны 170 мыңға жуықтаған ауданның әлеуметтік-экономикалық даму барысы басқа да негізгі көрсеткіштерден байқалады. Өнеркәсіп өнімі өндірісінің жалпы көлемі 17 млрд. 66 млн. 600 мың теңгені құрап, нақты көлем индексі 101,5 пайыз болды. Өткен жылы Қарғалы ауылында электрод шығаратын зауыт, қой жүнін өңдейтін фабрика іске қосылды. Алдағы уақытта Таңбалытас ауылында 400 жұмысшысы бар, қуаттылығы 600 тонналық цемент зауыты ашылмақ.
Жарыссөзге шыққан «Жақсылық» шаруа қожалығының төрағасы, Қазақстанның Еңбек Ері Жақсылық Үшкемпіров, «Шығыс кен басқармасы» ЖШС директоры Елена Катранова ауданда атқарылған істерге орай ой-пікірлерін ортаға салды. Тұрғындардан Тарғап ауылында дәрігерлік амбулатория салу, Таңбалытас ауылына табиғи газ тарту туралы ұсыныс түсті.
Жиын соңында сөз алған облыс әкімінің орынбасары Айдарбек Байжанов көпшілікті Жетісу өңірінде атқарылған жұмыстармен таныстырып, аудан аумағы арқылы өтетін халықаралық, республикалық, облыстық маңыздағы жолдардың жөнделу жайына тоқталды. Аудан жетістіктерін атап өтумен бірге орын алған кемшілікті сынға алып, құрылыс жұмыстары көлемінің кемуіне, «7-20-25» бағдарламасын іске асыру жобасының жоқтығына, ауыр қылмыс санының артуына назар аударды. Аудан әкімі мен жергілікті атқарушы органдар басшыларына кәсіпорындардың толық қуатында жұмыс істеуіне ықпал ету, ірі өндіріс орындарын жаңғырту, әлеуметтік маңызы бар азық-түлік бағасының орынсыз көтерілуіне жол бермеу, қылмыстың алдын алу, алыс ауылдарды газдандыру бағытында жұмыс жүргізуді тапсырды.
Жиынға қатысқан тұрғындар аудан әкімінің жұмысын қанағаттанарлық деп бағалады.
Серік САТЫБАЛДИЕВ
