Елбасы «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында келесі жылдың 1 қаңтарынан бастап ең төменгі жалақыны бір жарым есеге, яғни, 28 мың теңгеден 42 мың теңгеге дейін көтеруді тапсырды. Еңбек және халықты әлеуметтік қорғау министрлігінен алынған ақпаратқа сәйкес облыста 125 мың 910 жұмыскерден тұратын 51578 кәсіпорын бар. Мұның ішінде келесі жылдан бастап облыстағы жұмысшылар саны 250-ден асатын 84 мемлекеттік, 54 жекеменшік кәсіпорын еңбекақыны көтеруді қолға алмақшы. Алдын ала болжам бойынша, бұл кәсіпорындардағы 113903 жұмысшының 36591-і 42,5 мың теңгеден төмен жалақы алады.
Бүгінде облыста жалақыны арттыру бойынша жол картасы бекітілді. Ондағы іс-шаралар жоспарына сәйкес тізімдегі кәсіпорындарға мониторинг жүргізу арқылы ең төменгі санаттағы жұмыскерлердің еңбекақысын көтеруге байланысты ұжымдық шарттарға, жұмыс берушілердің актілеріне және еңбек шарттарына өзгерістер енгізу, жұмыс берушілерге ақпараттық түсіндіру жұмыстарын жүргізу тапсырылды. Сонымен қатар, жұмысшылардың жалақысын көтеру жөнінде әкімдік, өңірлік кәсіпкерлер палатасы, аумақтық кәсіподақтар бірлестігі және ірі кәсіпорындар арасында төрт жақты меморандумға қол қою жоспарлануда.
Жол картасы бойынша аудан, қалаларда атқарылған жұмыстардың нәтижесін жинақтау үшін мәліметтер әр аптаның бейсенбі күні облыстық еңбек инспекциясына ұсынылуы керек. 16 қараша күнгі ақпаратқа жүгінсек, облыстық еңбек инспекциясымен 137 кәсіпорынның 19 мың 821 жұмыскердің еңбекақысын өсіруге қатысты келісімге келгені белгілі болды. Жалпы еңбекақысы өсуге тиісті 36591 жұмысшының әрбірімен жұмыс жүргізілуі керек. Жыл аяқталуға бір жарым ай уақыт қалды. Демек, жұмысты ширата түскен жөн.
Осыған орай жұмысты жүйелі жүргізу үшін облыстық еңбек инспекциясы облыс әкімінің бірінші орынбасары Л. Тұрлашовқа хат жолдап, аудан, қала әкімдері салалық кәсіподақ өкілдерімен, Атамекен кәсіпкерлер палатасының өңірлік филиалымен бірлесіп, орта және шағын кәсіпорын жұмыскерлерінің жалақысын көтеру бойынша штаб құру жөнінде хат жолдады.
Аталмыш хатта аудан, қала әкімдіктерінің жаңадан ұжымдық шарттар жасау және жалақыны көтеру жөнінде бұрын қабылданған ұжымдық шарттарға өзгерістер енгізу мақсатында жұмыс жүргізу жолдары да көрсетілген. Сонымен қатар, ұжымдық шарттары жоқ кәсіпорындар да жалақыны көтеру бойынша жұмыс берушінің актілеріне өзгерістер енгізу жөнінде түсіндірме жұмыстарын жүргізуге міндеттелген.
Қ. ОМАРАҚЫН
