Бүгін І.Жансүгіров атындағы Жетісу мемлекеттік университеті гуманитарлық факультетінің мұрындық болуымен «Адамдарға сеніп өмір сүрем мен» атты ақын Мұратхан ШОҚАНМЕН кездесу кеші өтті.
Жиынға оқу орнының профессор-оқытушылары мен студенттер қатысты. Кездесуді гуманитарлық факультетінің деканы Айна Маратқызы ашып, іс-шараның мәні мен маңызына тоқталды.
– Кештің мақсаты – Мұратхан Шоқан поэзиясын, шығармашылығын өскелең ұрпаққа тереңірек таныстыру. Шара ақын шығармаларынан өзінше ой түюге және өлең құдіретінің қасиетін ұғынуға бағытталды, – деді факультет деканы. Жиын барысында студенттер көкейлерінде жүрген сан түрлі сауалын қойып, тиісті жауаптарын алды.
Сондай-ақ, профессор Сайлау Қожағұлов ақынның өлеңдеріне өз пікірін білдіріп, шығармашылығын талдап өтті. Кеш соңында шара ұйымдастырушылары жиналған қауымға ризашылығын білдіріп, ақынға сый-сияпат тапсырып, ілтипат көрсетті. Ақын өз кезегінде аталмыш білім ордасына алғысын айтып, өз өлеңдерін төгілте оқып берді.
Мұхтар КҮМІСБЕК
