Ұстаз мәртебесін көтеру, еңбегін лайықты бағалау, кәсіби іс-әрекетінде жоғары нәтижелерге жеткен шығармашыл мұғалімді анықтау, олардың озық іс-тәжірибесін зерттеу, тарату, кәсіби шеберліктерін арттыруға қолдау көрсету мақсатында Қазақстан педагогикалық ғылымдар академиясы жылына екі мәрте Республикалық тәуелсіз «Үздік ұстаз» байқауын өткізіп келеді.
Жуырда кезекті VІ Республикалық тәуелсіз қоғамдық «Үздік ұстаз» байқауының нәтижесі анықталды. Оған Астана, Алматы қалаларынан және еліміздің барлық облысынан мектеп, колледж және университет педагогтары қатысты. Байқауда еңбек өтілі 3 жылдан кем емес және жұмыста жеке үздік көрсеткіштері бар білім беру саласының қызметкерлері бақ сынады.
Облысымыздың Кербұлақ, Іле, Қарасай, Еңбекшіқазақ, Жамбыл, Райымбек, Панфилов аудандарынан қатысқан 22 үміткер топ жарды. Бұл қатарда Айгүл Жайынбаева, Күлтай Сәлімбаева, Валентина Захарчук, Ирина Гуслякова, Динара Хамитова, Айнұр Әбішева, Ботагөз Ілиясова, Күлсін Есенқұлова, Наталья Борецкая, Перуза Кенжалиева, Оксана Дюсембинова, Елена Цыбенко, Жаңыл Мұқымжанова, Жұмагүл Тұлымбекова, Раиса Құрманбаева, Ләйлә Ақжолтай, Гүлмира Байтенова, Бибігүл Жантемірова, Нұргүл Маханова, Жанар Абдрахманова, Жанар Құрманбаева сынды ұстаздар бар.
Жеңімпаздар «Үздік ұстаз» деп жазылған төсбелгімен, куәлікпен, сертификатпен марапатталды. Оларға аналитикалық есептері мен фотолары берілген электронды жинақ дискі тапсырылды
Еліміз көлеміндегі дүбірлі додада облыс ұстаздарының біліктілігі, іс-тәжірибесімен дараланып, топ жаруы біз үшін үлкен мақтаныш, абырой. Олардың әлі талай биіктерден көрініп, облыс мерейін асқақтата береріне кәміл сенеміз.
Келесі байқау қазан айының басында өтетінін хабарлай отырып, аталмыш сынға облысымыздың ізденімпаз, шығармашыл оқытушы-мұғалімдерін қатысуға шақырамыз.
Алма ЕСЕНБАЕВА
