Ескелді ауданында 21 мың гектар суармалы алқап бар. Биыл су жүйесін жаңғырту жұмысына байланысты оның көлемі 3-4 мың гектарға дейін ұлғаймақ. Бұл туралы облыс әкімінің орынбасары Серікжан Бескемпіровтың Ескелді ауданының ауылшаруашылығы құрылымдарын аралауы барысында айтылды. Егіс алқабының осынша көлемде ұлғаюына аймақтағы ирригацияның қалпына келтірілуі себеп. Ақпанда басталған маңызды жобаға Ислам даму банкінен 1,5 млрд. теңге бөлінген. Осы бағыттағы жұмыс барысымен танысқан өңір басшысының орынбасары ирандық инвесторлардың қатысуымен ауданда қолға алынған тауарлы-сүт фермасының құрылыс алаңында да болып қайтты.
Ескелді ауданындағы су арналарын ретке келтірумен «Асатай» жауапкершілігі шектеулі серіктестігі айналысуда. Облыс әкімінің орынбасары серіктестік өкілдерімен кездесіп, ондағы жұмыс барысымен танысты. Жоспар бойынша аталған серіктестік аудандағы 300 шақырымға жуық су арнасын тазартуы тиіс. Бүгінде оның 100 шақырымнан астамы тазаланды. Яғни, ескі суағарлар ауыстырылып, су жіберу қондырғылары мен гидробекеттер орнатылған.
Аталмыш серіктестік директорының орынбасары Асқар Құрманғалиевтың айтуынша, мұнда қазір магистральды каналдар қазылып, алқаптарға кедергісіз су жеткізу мәселесі шешілуде. Нәтижесінде, аймақтағы тәтті түбір өсіру алқабы артып, шаруалардың мол өнім алуына мүмкіндік тумақ.
Осы ретте, Серікжан Іслямұлы бұл бағыттағы жұмыстың тыңғылықты істелуі керектігін айта келіп, бүгінде су арналарын тазалау жұмысының тек қана Ескелдіде емес, Ақсу, Көксу, Алакөл аудандарында да жүргізіліп жатқанын жеткізді. Сонымен қатар, егістікке кедергісіз су жеткізу мақсатында ауыстырылып жатқан науалардың да сапасын байқады.
Бұдан соң облыс әкімінің орынбасары Серікжан Бескемпіров Ескелді ауданында салынып жатқан тауарлы сүт фермасына ат басын бұрды. Құны 1 млрд. теңге болатын жобаның бүгінде іргетасы қаланып, фермаға баратын жол салынып жатыр.
«Сүт Мастер М» жауапкершілігі шектеулі серіктестігінің инженері Александр Белюков ферма құрылысының биыл қаңтарда басталғанын баяндай келіп:
– Жобаны жүзеге асыруға бізге бір жыл уақыт берді. Шаруашылық іске қосылғанда 30 шақты тұрғынды жұмыспен, тұрақты жалақымен қамтитын боламыз. Фермамызда Ирландия мемлекетінің үздік технологиялары орнатылып, жуық арада халықты сапалы әрі табиғи сүт өнімімен қамтамасыз етпекпіз, – деді.
Айта кетерлігі, болашақта мұнда Чехословакиядан асыл тұқымды 600 бас «Голштино фриз» сиыры әкелінбек. Соның есебінен аталмыш серіктестікте жылына 2 млн. литр сүт өндіру жоспарланған.
Қозыбай ҚҰРМАН.
