Еліміздің тыныштығы жолында еңбек етіп, әскерге жарамды жастарды іріктеумен айналысатын облыстық қорғаныс істері жөніндегі департаментінің құрылғанына биыл 100 жыл толып отыр. Алғашында 1918 жылы «Әскери комиссариат» деп аталған құрылым заман ағымына орай 7 рет өзгеріске түсіп, 2004 жылы 16 сәуірде «Алматы облысының қорғаныс істері жөніндегі департаменті» болып құрылған.
Бүгінде құрамында 17 аудандық және қалалық қорғаныс істері жөніндегі біріктірілген басқарма мен бөлімдер кіретін департамент әр азаматты әскер қатарына алғаннан бастап, әскери жолын аяқтағанға дейін қадағалайды. Яғни азаматтарды учаскелерге тіркеу, мерзімді әскерге шақыру, әскери билет алу, келісімшарт бойынша әскер қатарына қабылдау, запастағы офицерлерді әскер қатарына шақырту, жұмылдыру жұмыстары, Әскери-техникалық мектептерге іріктеу, ардагерлермен жұмыс жүргізу сынды көптеген жұмыстар осы мекеменің қабырғасында атқарылады.
Жыл сайын ҚР Қорғаныс министрлігінің жоспарына сәйкес көктемгі және күзгі мерзімді әскери қызметке шақыру науқаны жүргізіледі. Дәл қазір еліміз бойынша көктемгі әскер қатарына шақыру жұмыстары жүруде. Облыстық қорғаныс істері жөніндегі департаменті де әскерге шақыру науқанына белсене қатысып, биылғы көктемде Жетісу жерінен шақырылатын 1991-2000 жылы туған 1800-ден астам азаматты әскер қатарына алу жұмыстарын жүргізуде.
Облыстық қорғаныс істері жөніндегі департаменті бастығының міндетін уақытша атқарушы подполковник Талғат Дәулетхановтың айтуынша, жастарды әскерге шақырту науқаны қызықты әрі патриоттық тұрғыда өткізіледі.
– «Әскери қызмет және әскери қызметшілердің мәртебесі туралы» ҚР Заңына сәйкес мерзімді әскери қызметке 18 бен 27 жас аралығындағы, мерзімін кейінге қалдыруға және әскерден босатылуға құқы жоқ азаматтар қабылданады, – деген Талғат Жасболатұлы әскерге шақырылатындардың денсаулығына тоқталды. – Биыл облыстан 500-ге жуық азамат әскери борыштарын өтеу үшін ҚР ҰҚК Шекара қызметіне және Президенттің Мемлекеттік күзет қызметіне аттандырылды. Әскери бөлім мен мекеме басшылары әрқашан облыстан қабылданған жастардың ерік-жігері мен Отанға деген патриоттық сезімдерінің жоғары екенін ерекше атап отырады. Соған орай сарбаздардың ата-аналарына Алғыс хат, Грамоталар жолдаймыз. Бұл біз үшін үлкен қуаныш, себебі, санға ғана емес, сапаға да басты назар аударамыз.
Жетісу жерінің азаматтары Қазақстан Республикасының Қарулы Күштерінде, ҰҚҚ Шекара қызметінде, Президенттің Мемлекеттік күзет қызметі, сондай-ақ, ҚР ІІМ Ұлттық Ұланның қатарында әскери борыштарын өтеп келеді. Қазіргі жастардың Отан алдындағы борышын өтеуге деген құлшынысы қуантады. Өз еркімен сұранып келушілер жетерлік. Дегенмен, олардың әскерге жарамды-жарамсыздығына арнайы комиссия сараптамасынан кейін ғана шешім шығарылады. Жалпы әскерге ниеттілердің басым бөлігі ауыл жастары. Пайызға шақсақ, 70%-ды құрайды. Оның себебі, ауыл жастарының басым бөлігінің денсаулығы мықты, денесі шымыр, психологиялық тұрғыдан тұрақты келетіндігінде.
Жалпы әскерге шақырылатын жігіттің ең алдымен алған білімі, мамандығы, отбасы жағдайы, спорттағы жетістігі, денсаулығы, дене бітімі, бойының ұзын-қысқалығы назарға алынып, іріктеледі. Сондай-ақ, әлеуметтік жағдайы тұрақты, отбасының толықтығы да қаралады. Мысалы, былтыр әскерге алынғандардың 27 пайызы толық емес отбасынан шыққандар болса, 2,4 пайызы ата-анасыз тұл жетім екендігі анықталды. Ал биылғы 2 айдың ішінде әскерге алынған 400-ден астам азаматтың 15 пайызы толық емес отбасынан шықса, ата-анасынан бірдей айырылғандар саны 0,2 пайызды құрайды. Одан бөлек, олардың 74,5%-ы жұмысшылардың, 17,4%-ы зейнеткерлердің, 18,6%-ы қызметкерлердің, 2,9%-ы кәсіпкерлердің балалары.
Облыстық қорғаныс істері жөніндегі департаменті мерзімді әскерге шақырудан өзге патриоттық бағыттағы түрлі іс-шаралар атқарып келеді. Олардың қатарында орта мектеп, арнайы орта білім беретін оқу орындарының оқушыларына арналған «Ерлік сабақтары» мен Ашық есік күндері акциясы бар. Мұндай шараларға оқушылардың ата-аналары, Екінші дүниежүзілік соғыстың ардагерлері, Ауған соғысы және Қарулы Күштерінің ардагерлері қатысады. Жыл сайын дәстүрлі түрде «Әскерге шақырылушылар күні» атты әскери-патриоттық акциясы өткізіліп, жас сарбаздарды салтанатты түрде әскери бөлімдерге шығарып салады. ҚР Қорғаныс министрлігінің ұйымдастыруымен жыл сайын өткізілетін «Айбын» әскери-патриоттық жастар жиынына былтыр облыстан қатысқан «Жетісу тарландары» әскери-патриоттық клубының тәрбиеленушілері 1-орынға ие болып, грамотамен, құнды сыйлықтармен марапатталды. Сондай-ақ, «Жас Ұлан–2017» 19-шы республикалық армия әндері фестивалінен Талдықорған саз колледжінің студенті Құралай Мұқият жүлделі орын иеленді.
Осындай игілікті істердің ұйытқысы болып отырған департаменттің жұмысына табыс тіледік.
Мәди АЛЖАНБАЙ.
