Отты жырлары талай жүректі тулатқан, сан көңілді толқытқан ғажайып ақындар текті жұрттан көптеп шыққан. Солардың ішінде өзінің сыршылдығымен, нәзік те нәркес иірімімен, айрықша бөлек қолтаңбасымен ерекшеленген шайырлар ел құрметіне бөленіп, туындылары санада сақталып келеді. Міне, сол ақындардың санатындағы Қазақстан Жазушылар одағының мүшесі, Балқаш ауданының Құрметті азаматы Нұрсапа Аманжоловтың туғанына биыл 85 жыл. Осыған орай Балқаш аудандық кітапханасында «Мен халқыммен мәңгімін» атты жыр кеші өтті.
Елбасы Нұрсұлтан Назарбаевтың «Болашаққа бағдар: рухани жаңғыру» мақаласын жүзеге асыру, ақынның шығармашылығын дәріптеп, өмір жолын жас ұрпаққа үлгі ету мақсатында ұйымдастырылған игі шараға шайырдың зайыбы Париза, ұлдары Біржан, Арман мен немерелері, замандастары және №1 орта мектептің оқушылары, кітапханашылар, Мәдениет үйі қызметкерлері қатысты.
Аудандық кітапхананың кітапханашысы Ботакөз Ақсақалова мен Бақбақты ауылдық кітапханасының кітапханашысы Жазира Түстікбаева бастан-аяқ жүргізіп отырған рухани шарада айтулы ақынның өнегеге толы өмірі, еңбек жолдары туралы тың деректер ашылды. Сонымен қатар, Нұрсапа Аманжоловтың өлеңін Миялы ауылдық кітапханасының кітапханашысы Жазира Диханбаева мен №1 орта мектебінің оқушылары нақышына келтіре оқып, тыңдарманды тебірентсе, бақбақтылық ақын Шұға Смағұлқызы мен Бақанас мектеп-интернатының кітапханашысы Жанна Нахақызы арнау өлеңдерін тебірене толғады.
Рухты тасытып, жүректі толқытқан ғажайып шара барысында Балқаш ауданының Құрметті азаматы Кеңесбек Әбдікаримов ақын туралы естеліктер айтып, өлеңінен үзінді оқып, жиылған қауымға ән тарту етті. Ал қасиетті жырмен сусындап өскен қонақтар жарқын тұлғаның өзгеше қасиеттері мен өнеге тұнған өмірі жайында естелік айтып, арда азаматын сағынышпен еске алды. Рухани кешке арнайы шақырылған ақынның жары Париза апай мен балалары ақынын ардақтаған елі мен игі шараны ұйымдастырған азаматтарға алғысын жеткізсе, Мәдениет үйінің қызметкері Гүлмира Қасабекова мен №1 орта мектептің 5-сынып оқушысы СабинаТөлеубек әннен шашу шашты.
Халқын ерекше сүйіп, оны мәңгілік жырына арқау еткен арда ақынға арналған кешті аудандық мәдениет және тілдерді дамыту бөлімінің басшысы Роза Суанбаева қорытындылады. Ол асқақ тұлғасымен, айдынды да мөлдір шығармашылығымен ел есінде қалған арда ақынды текті халық ешқашан санадан шығармайтындығын, керісінше, жыл өткен сайын мөлдір тұмбасынан рухани шөл басатындығын айрықша атап өтті.
Асыл СҰЛТАНҒАЗЫ.
